Sot nisi lufta tarifore edhe për Shqipërinë. Kontejnerët me mallra që nisen nga portat tona doganore do të përballen me tarifën 10% kur të mbërrijnë në tokën amerikane.
Në mes të një mjegullnaje pasigurie globale, ajo që paralajmërojnë të gjithë është një tjetër valë inflacioni, pra shtrenjtim të çmimeve thuajse të çdo kategorie, rritje të kostove për prodhuesit e eksportuesit, më pak turizëm e remitanca e deri tek shkurtim i vendeve të punës. Por mund të përdoret edhe si faktor për të nxitur prodhimin vendas dhe shkëmbimet tregtare rajonale.
Shqipëria edhe pse në dukje është larg dhe jo e afërt në aspektin tregtar me SHBA-në ekspertët paralajmërojnë rritje të kostove për eksportuesit shqiptar.
“Do sjelli një ndryshim, një realitet ndryshe. Neve kemi një numër të kufizuar volumi tregtar sa i përket marrëdhënieve të tregtisë së jashtme me SHBA për një mori arsyesh, edhe për shkakun e largësisë që kanë tregjet, por edhe për shkakun se ne jemi një treg i vogël. Nga ana tjetër ne jemi shumë afër me tregun e BE që e kemi një treg të synuar për t’u bërë pjesë e tij, por edhe produktet tona të kenë një nivel shumë të lartë eksporti në këto vende pasi nivelet e importit ne realisht jemi shumë të varur nga këto produkte. Duke qenë se është një volum i vogël dhe efektet do ndihen po do ndihen në mënyrë shumë të kufizuar. Do të ndihen tek ato biznese që kanë nivel eksporti, eksportojnë në SHBA, por do ndihet më pak në ekonominë shqiptare”, tha Teuta Nunaj Kortoçi Eksperte Ekonomie
Marrëdhënia tregtare Shqipëri-SHBA paraqitet me deficit pasi importojmë 3 dhe eksportojmë 1, ose e thënë thjeshtë kemi 205 milionë euro importe dhe 70 milionë euro eksporte.
“Tek këto kompani eksporti, sidomos kompanitë që janë pjesë e produkteve ushqimore dhe bimëve medicinale, duke qenë se ato pësuan një dëm të konsiderueshëm përgjatë ndryshimeve të ndjeshme të kursit të këmbimit gjatë 2023 dhe 2024, do kenë një goditje të dytë. Bimët mjekësore do të kenë një goditje të dytë pas kursit të këmbimit, nëse nuk do të mbështeten dhe subvencionohen nga ana e qeverisë për ti mbajtur në aktivitet. Qeveria në këtë rast mund të negociojë një marrëveshje me SHBA nëse do vendosin të kenë 0% tarifë”, shprehet ekspertja ekonomisë.
50% e totalit të eksporteve që Shqipëria ka me Amerikën janë alumin, çelik, dhe gizë me 34.8 milionë euro, ndjekur më pas nga bimët mjekësore me 16.4 milionë euro ose 23% e totalit të eksporteve në vitin e kaluar. Të dy këto sektorë do të kenë kosto të shtuara, bashkë me industrinë e manifakturës.
Tarifat e Trump tronditën menjëherë edhe bursat ndërkombëtare.
“Bursat nuk e mirëpritën, pasi tarifat sollën tronditje të tregjeve”, tha Kortoçi.
Prej datës 2 prill kur Donald Trump shpalli tarifat e reja çmimi i naftës bruto në bursë ra nga 75 dollarë fuçia në 65 dollarë këtë të shtunë. E njëjta gjë ndodhi edhe me energjinë elektrike nga afro 89 euro një megavat më 2 prill, në 67 euro megavati sot.
"Nëse ne deri tani kishim një politikë me tarifa shumë të ulta doganore ose thuajse zero tarifa doganore pasi kishim atë zhvillimin që e kemi quajtur globalizëm dhe globalizmi këtë ka: uljen e tarifave doganore, hapjn e tregjeve, t’u jepet mundësi kompanive që të shkojnë dhe ta zhvillojnë produktin e tyre atje ku ato e gjykojnë se është më mirë për ekonomitë e tyre dhe më tej dhe efekti që jep dhe për vendet. Në këtë rast kemi politika protekstioniste, pra rikthehet tek ekonomia nacionale, me tendenca shumë të forta",-tha Kortoçi.
Komente
