Zyrtarët lokalë në Rusi thanë se të paktën 50 persona janë plagosur dhe një person ka vdekur nga një shpërthim në një depo fishekzjarresh afër Moskës në qytetin Sergiyev Posad, rreth 70 kilometra larg Moskës. Gjashtë nga të plagosurit ndodhen në gjende të rëndë për shkak të djegieve të rënda dhe lëndimeve në kokë. Disa prej plagosurve kanë marrë lëndime nga copëzat e metalit.
Kanali i pavarur në Telegram, cila prBaza, shpërndau një video ku duket një re e madhe tymi dhe e identifikoi ndërtesën e goditur si Fabrika Optike dhe Mekanike e Zagorskut, e odhon mjete për shikim gjatë natës dhe mjete tjera optike për ushtrinë. Zyrtarët rusë e konfirmuan më vonë. Agjencia e lajmeve TASS duke cituar shërbimet emergjente mohoi lajmin që qarkullonte në rrjetet sociale se shpërthimi u shkaktua nga një sulm me dron.
TASS raportoi se shpërthimi ndodhi në vendin ku po mbaheshin mjetet piroteknike dhe se u shkatërrua një depo e madhe. Një zjarr i papritur e kishte dëmtuar të njëjtën fabrikë Zagorsk në qershor 2022.
Ndërkohë, të paktën tre persona janë vrarë si pasojë e një sulmi rus në qytetin e Ukrainës jugore, Zaporizhia, ka thënë presidenti i Ukrainës, Volodymyr Zelensky.
Të paktën tre persona janë vrarë si pasojë e një sulmi rus në qytetin e Ukrainës jugore, Zaporizhia, të mërkurën, ka thënë presidenti i Ukrainës, Volodymyr Zelensky.
“Zaporizhia. Tjetër sulm terrorist nga rusët. Raportohet se deri tani kanë vdekur tre njerëz”, tha Zelensky në rrjetet sociale.
Operacionet e shpëtimit kanë nisur”, shtoi ai.
Yuriy Malashko, kryetar i rajonit Zaporizhja, tha se Rusia i ka sulmuar “kishën dhe dyqanet e rrobave” në rrethinën Shevçenkivski.
“Mjekët janë duke i trajtuar të plagosurit. Dridhjet nga shpërthimi i thyen xhamat e ndërtesave të larta”, theksoi ai.
Ky sulm vjen pak orë pasi zyrtarët lokalë në Rusi thanë se të paktën 43 persona u plagosën nga një shpërthim në një fabrikë optike në qytetin Sergiyev Posad, rreth 70 kilometra larg Moskës, më 9 gusht.
Dronët të cilët komandohen nga ushtria ukrainase janë kthyer në një makth për Rusinë.
Një dron është përplasur me disa persona të cilët janë pro-rus, para se të arrinin të ngrinin në ajër dronët kamikaz.
Këto pamje të publikuara nga Policia Kombëtare e Ukrainës dhe Forcat e Mbrojtjes Territoriale thuhet se tregojnë trupat që eliminojnë pro-rusët duke përdorur një çati në Oleshki për të nisur dronët kundër trupave ukrainase.
Lufta çdo ditë e më shumë po shkakton humbje të mëdha ushtarësh, të cilët menduan se do ta kenë të lehtë në këtë luftë duke menduar edhe se do të mbaronte shumë shpejt.
Së fundmi, dëshmohet mjaft mirë sesa të rëndësishëm janë operatorët e droneve të ushtrisë ukrainase në këtë luftë.
Ata kishin pikasur një grup të rinjsh në kulmin e një ndërtese në Oleshki duke tentuar të lansojnë dronët kamikazë që për objektiv kishin ushtrinë ukrainase.
Moska akuzoi Poloninë dhe Finlandën se kërcënojnë sigurinë e saj të mërkurën dhe u zotua t'u jepte një përgjigje ndaj shumëfishimit të "kërcënimeve" në kufirin perëndimor të Rusisë nga anëtarët e NATO-s.
Polonia, aleati dhe fqinji i vendosur i Ukrainës, ka forcuar sigurinë në kufirin e saj me Bjellorusinë pasi Minsku u bë një bazë e re për luftëtarët rusë Wagner.
Finlanda, e cila ndan një kufi të gjatë me Rusinë, u bashkua me NATO-n në prill në një lëvizje historike të nxitur nga ofensiva e Moskës në Ukrainë, raportojnë mediat e huaja.
“Kërcënimet për sigurinë ushtarake të Federatës Ruse janë shumëfishuar në drejtimet strategjike perëndimore dhe veriperëndimore. Këto rreziqe kërkojnë një përgjigje në kohë dhe adekuate. Ne do të diskutojmë masat e nevojshme për neutralizimin e tyre në takim dhe do të marrim vendimet e duhura”, tha ministri rus i Mbrojtjes Sergei Shoigu në një takim me zyrtarë ushtarakë.
Ai veçoi Poloninë, për të cilën tha se po "militarizohej" dhe po përdorej nga Shtetet e Bashkuara "si instrumenti kryesor i politikës anti-ruse". Varshava njoftoi të mërkurën se do të dërgonte 2000 trupa shtesë në kufirin e saj lindor për t'iu bashkuar 2000 ushtarëve të vendosur tashmë atje.
Anëtari i NATO-s javën e kaluar tha se helikopterët bjellorusë kishin shkelur hapësirën e saj ajrore dhe ka paralajmëruar për provokime nga Bjellorusia. Shoigu tha se trupat polake do të ishin në "afërsi të menjëhershme të kufijve të shtetit të Bashkimit", duke iu referuar një aleance midis Moskës dhe Minskut.
Presidenti Vladimir Putin tha muajin e kaluar se Moska do t'i përgjigjet çdo agresioni kundër Bjellorusisë "me të gjitha mjetet në dispozicion". Shoigu tha gjithashtu se "një faktor serioz destabilizues është anëtarësimi i Finlandës në NATO dhe në të ardhmen Suedia."
Muajin e kaluar, Turqia hoqi kundërshtimin e saj ndaj hyrjes së Suedisë në NATO, duke ndezur dritën jeshile për aspiratat e pranimit të Stokholmit. Kremlini ka thënë se anëtarësimi i Suedisë në NATO do të rrezikonte sigurinë e Rusisë dhe tha se po planifikonte kundërmasa. Suedia ndan një kufi të shkurtër Arktik me Rusinë.
Zëdhënësja e ministrisë së Jashtme, Maria Zakharova, duke komentuar deklaratën e diplomatit evropian mbi marrëveshjen e grurit tha se “komuniteti botëror duhet të bëjë përgjegjës Borrellin për përhapjen e gënjeshtrave”.
Josep Borrell në deklaratën e tij të mëparshme tha se sanksionet ndaj Moskës nuk ndikojnë në sigurinë globale të ushqimit, por Rusia tha se kryediplomati i BE-së po gënjen, raportojnë mediat e huaja.
Ajo vuri në dukje se Borrell nuk i mbështeti deklaratat e tij me fakte kur tha se Rusia përfitoi nga marrëveshja e grurit të korrikut 2022 dhe argumentoi për efektin e sanksioneve të BE-së kundër Rusisë në sigurinë globale të ushqimit.
Zakharova i quajti komentet e Borrell si “dezinformata dhe të rreme”, duke thënë se përfundimi i marrëveshjes kufizon mundësitë e BE-së “për të rimbushur arkat e veta dhe pa u ndëshkuar për të përfituar nga shtetet më të cenueshme, duke u pasuruar në kurriz të tyre duke rishitur grurë të lirë ukrainas.”
Ajo i bëri thirrje BE-së që “ose të ndalojë destabilizimin e qëllimshëm të tregjeve globale të ushqimit duke futur gjithnjë e më shumë kufizime mbi produktet bujqësore ruse dhe bjelloruse, ose të ndalojë të pretendojë të jetë një ithtar i garantimit të sigurisë globale të ushqimit”.
Më 17 korrik, Rusia pezulloi pjesëmarrjen e saj në marrëveshjen e grurit të Detit të Zi, duke thënë se pjesa ruse e marrëveshjes nuk u zbatua.
Presidenti i Ukrainës, Volodymyr Zelensky, tha të mërkurën se ai zhvilloi një takim me komandantët e lartë ushtarakë për kundërofensivë.
“Takimi me Shtabin e Komandantit Suprem të Përgjithshëm ishte në një format të veçantë. Rrethi më i ngushtë i njerëzve dhe vëmendja maksimale ishin ndaj një teme të vetme. Ne bëmë një analizë të thelluar të situatës aktuale, planifikimin e hapave të ardhshëm, sigurimin e ushtarëve dhe çdo analizë të veprimeve të armikut”, ka shkruar Zelensky në Telegram.
Në fillim të kësaj jave Zelensky, pranoi se kundërofensiva ka qenë "e vështirë", tha ai në një video nga zyra e tij të martën. Kjo i shtyu zyrtarët amerikanë të pranonin se përparimi i fundit i Ukrainës ishte ngadalësuar.
“Edhe ukrainasit duke përfshirë presidentin Zelensky, kanë thënë se nuk po shkojnë aq larg ose aq shpejt sa ai do të donte”, tha të martën për CNN Koordinatori i Këshillit të Sigurisë Kombëtare të Shtëpisë së Bardhë për Komunikimet Strategjike, John Kirby.
Sfida kryesore për forcat ukrainase është vështirësia e vazhdueshme për të thyer linjat mbrojtëse shumështresore të Rusisë në pjesët lindore dhe jugore të vendit, të cilat janë të shënuara nga dhjetëra mijëra mina.
Forcat ukrainase kanë pësuar humbje marramendëse atje, duke bërë që komandantët ukrainas të pengojnë disa njësi për t'u rigrupuar dhe për të zvogëluar viktimat.
Një depo fishekzjarresh e vendosur brenda uzinës optike-mekanike Zagorsk në qytetin Sergiev Posad në periferi të Moskës shpërtheu mëngjesin e sotëm, raporton shërbimi rus i urgjencës.
Zyrtarët e shërbimit emergjent kishin raportuar se shpërthimi ndodhi në dhomat e kaldajave të Uzinës Optiko-Mekanike Zagorsk.
Autoritetet ruse sqarojnë se shpërthimi i mëngjesit të sotëm në Sergiev Posad ishte për shkak të një “gabimi njerëzor” dhe jo të një sulmi me dron, ku mbetën të plagosur 35 persona.
“Janë shkatërruar 1600 metra katrorë hangarë të cilat i ishin shitur një kompanie private nga Zagorsk”, saktëson Ministria e Emergjencave.
Shpërthimi në Sergiev Posad afër Moskës preku edhe një fabrikë që zhvillon dhe prodhon pajisje optike dhe optoelektronike për zbatimin e ligjit, industrinë dhe kujdesin shëndetësor rus. Ajo prodhon veçanërisht produkte ushtarake. Që nga fillimi i verës, kjo është fabrika e tretë në Rusi e lidhur me industrinë e mbrojtjes, ku ndodhi një shpërthim.
Presidenti rus, Vladimir Putin, është detyruar të nxjerrë nga një bazë ushtarake në Siberi 1,570 tanke të ndryshkura të cilat tashmë po modifikohen, po pastrohen dhe po zhvendosen drejt frontit ukrainas.
Sipas raportit këto tanke janë rikthyer në shërbim për luftën e presidentit rus kundër Ukrainës, raporton Daily Mail.
Më shumë se 40 përqind e 3,840 tankeve dhe automjeteve ushtarake të paraqitura në fotografitë satelitore nga Google Earth në depon e pajisjeve ushtarake Vagzhanovo para luftës tani janë nxjerrë nga magazinimi.
Ndër to janë edhe tanket e vjetra të tipit T-62, të prodhuara në vitin 1975. Rusia dihet se po rinovon tanket e epokës sovjetike për shkak të humbjeve të Rusisë në luftë. Putin ka urdhëruar ndërtimin e dy impianteve të riparimit të tankeve.
Gjatë një vizite në uzinë në gjashtë zona kohore në lindje të Moskës, propagandisti i Putinit, Andrey Gurulev, 55 vjeç, tha:
"Tanket, më shumë se 50 vjeç, po shndërrohen në makina moderne, normale të afta për të kryer detyrat. dhe përmbushja e sfidave aktuale të vijës së parë. Këto tanke T-62 janë plotësisht të modernizuar”.
Sipas ekspertëve, përdorimi i këtyre armëve të vjetra të periudhës sovjetike është një shenjë e dëshpërimit të Putinit, por edhe e llogaritjes së gabuar se burimet ekzistuese do të plotësonin nevojat e tij të luftës.
Polonia do të dërgojë 2000 trupa në kufirin e Bjellorusisë për të mbështetur Rojet Kufitare, deklaroi zëvendësministri i saj i Brendshëm, Maciej Wasik.
Njoftimi i Wasik vjen pasi vendi ra dakord të rrisë numrin e ushtarëve pas një kërkese për përforcime ditën e djeshme.
Janë ngritur shqetësime në lidhje me veprimet e mundshme ushtarake nga Bjellorusia pasi thuhet se vendosi të kryejë stërvitje në Suwalki Gap.
Zyrtarët bjellorusë konfirmuan se një njësi tankesh i ishte nënshtruar testeve të zjarrit të drejtpërdrejtë në poligonin e qitjes Gozhsky, 15 km nga qyteti i Grodno, i cili shtrihet në kufirin Bjellorusi-Poloni.
Luftëtarët mercenar rusë Wagner kanë marrë gjithashtu pjesë në stërvitjet stërvitore pranë kufirit dhe ka pasur sugjerime se grupi po krijon një "qytet tende" 24 km larg kufirit jugor të Bjellorusisë me Ukrainën.
Letonia dhe Lituania po i bashkohen gjithashtu Polonisë në forcimin e kufijve të tyre me Bjellorusinë.
Presidenti rus, Vladimir Putin, ka paraqitur një projektligj federal kushtetues në Dumë, i cili shfuqizon nevojën për të njoftuar Sekretarin e Përgjithshëm të Këshillit të Evropës për futjen ose ndërprerjen e ligjit ushtarak ose gjendjes së jashtëzakonshme në Rusi.
Legjislacioni aktualisht në fuqi, në fakt, parashikon që në rast të vendosjes së ligjit ushtarak ose gjendjes së jashtëzakonshme në të gjithë territorin kombëtar ose në disa rajone, Moska duhet të njoftojë sekretarët e përgjithshëm të Këshillit të Evropës dhe të Kombeve të Bashkuara.
Për më tepër, OKB-ja dhe Këshilli i Evropës janë të informuar edhe në rast të përfundimit të gjendjes ushtarake ose gjendjes së jashtëzakonshme.
Rregullat e reja propozojnë të përjashtohen nga ligjet detyrimet e informacionit ndaj Sekretarit të Përgjithshëm të Këshillit të Evropës, duke ruajtur vetëm dispozitat që kanë të bëjnë me Sekretarin e Përgjithshëm të Kombeve të Bashkuara.
Anëtarët e Shërbimit Federal të Sigurisë të Federatës Ruse (FSB) kanë arrestuar një “agjent rus që hodhi në erë një tubacion gazi me udhëzime nga shërbimet speciale të Ukrainës" në Krime, raporton FSB.
“Shërbimi Federal i Sigurisë i Federatës Ruse ka ndaluar veprimtarinë kriminale të një shtetasi rus, të lindur në vitin 1980, i cili ishte përfshirë në kryerjen e një akti sabotazhi dhe terrorizmi në impiantin e infrastrukturës energjetike të Republikës së Krimesë me udhëzimet e shërbimet speciale ukrainas”, thuhet në raportin e RIA Novosti.
Shtetasi rus, sipas shërbimeve sekrete të Moskës, ishte rekrutuar nga shërbimet speciale të Ukrainës, të cilët e trajnuan për akte sabotazhi dhe më pas e dërguan në Krime.
“Me udhëzimet e ukrainasve, më 23 qershor, ai hodhi në erë një tubacion gazi në fshatin Koreiz, duke përdorur një mjet shpërthyes të improvizuar. Në garazhin e personit të përfshirë, ndër të tjera, “u gjet një eksploziv plastik i prodhimit të huaj “S-4” me peshë dy kilogramë, u sekuestruan dy detonatorë elektrikë për qëllime ushtarake. Është hapur edhe një çështje penale”, thuhet në raportin e FSB.
Presidenti amerikan, Joe Biden, i ka dhënë dritën jeshile trajnimit të pilotëve ukrainas në avionët F16. Zëdhënësja e Departamentit të Mbrojtjes të SHBA , Sabrina Singh u shpreh se Danimarka dhe Holanda po udhëheqin trajnimin.
"Danimarka dhe Holanda po udhëheqin trajnimin. Ne kemi dhe presidenti ka dhënë dritën jeshile për të lejuar dhe mbështetur trajnimin. por nuk kam ndonjë përditësim të mëtejshëm për momentin pasi këta janë pilotë specifikë në trajnim”.
Komente
Putin i ka derguar ushtaret me lopata se skane arme shkruanin mediat para disa kohesh kurse tani nxoren teorine e tankeve te ndryshkur , lind pyetja po Natos kush po ja shkaterron keto arme dhe po vret me mijera ushtare ? Asnjeri nuk i beson keto mashtrime qe jame trilluar nga fillimi i konfliktit dhe deri tani
Përgjigju