Departamenti i komunikimeve përmes një shkrimi në Telegramin e ushtrisë ukrainase, njoftoi se Ukraina kishte marrë përgjegjësinë për sulmin në selinë e flotës ruse të Detit të Zi në Sevastopol, Krime. Në shkrimin e publikuar thuhet se ky sulm kishte ndodhur më 22 shtator në orën 12:00 me orën lokale.
Oleg Kryuchkov, këshilltar për politikat e TI-së i kreut të Republikës së aneksuar nga Rusia, deklaroi sot se pas sulmit me raketa kundër selisë së Flotës së Detit të Zi në Sevastopol, ka ndodhur edhe një sulm kibernetik “i paprecedentë" në Krime.
Pas pjesëmarrjes në Këshillin e Sigurimit në OKB, presidenti i Ukrainës, Volodymyr Zelenslyy vijoi turin e tij në një takim në Shtëpinë e Bardhë me presidentin amerikan Joe Biden.
Takimi mes dy krerëve duket se ishte shumë frytdhënës për presidentin ukrainas dhe vendin e tij.
Biden u zotua se do të dislokojë në Ukrainë municione të larmishme ushtarake me vlerë 355 milionë dollarë, me besimin se Kongresi amerikan do të jetë mirëkuptues për miratimin e këtij fraksioni ndihme të kërkuar nga ai aktualisht, pas kërkesës së tij për 24 miliardë dollarë shtesë për nevojat ushtarake dhe humanitare të Ukrainës.
"Zoti President, ne jemi me ju, do të vazhdojmë mbështetjen tonë për ju"-është shprehur presidenti Biden.
Në arsenalin e parashikuar përfshihen raketa të mbrojtjes ajrore, municione për raketat e shumta Himar, armë antitank dhe municione artilerie, por jo raketat me rreze të gjatë ATACMS të kërkuara nga Kievi.
“Falenderoj Shtetet e Bashkuara të Amerikës dhe Presidentin Biden, për ndihmën e re ushtarake për Ukrainën. Një ndihmë shumë e fuqishme. Shume faleminderit”,-deklaroi Zelenskyy duke shprehur mirënjohjen e tij për mbështjen e SHBA-së ndaj Ukrainës.
Ndër të jera në takimin e mbajtur në Shtëpinë e Bardhë u fol dhe për eksportin e grurit.
"Ne kemi rënë dakord me Shtetet e Bashkuara për masa specifike për të zgjeruar eksportet e grurit nga Ukraina."-ka deklaruar Zelenskyy.
Zelenskyy ka zhvilluar një sërë takimesh në SHBA duke përfshirë takime me ligjvënës në Kapitol dhe me Sekretarin e Mbrojtjes në Pentagon.
Që nga fillimi i agresionit rus ndaj Ukrainës, Shtetet e Bashkuara kanë dërguar rreth 113 miliardë dollarë ndihmë humanitare dhe sigurie.
Pas takimit me Biden, presidenti i Ukrainës u nis drejtë Kanadasë ku dhe pritet të flasë në parlamentin e këtij vendi.
Lajm në përditësim....
Kryeministri i Polonisë, Mateusz Morawiecki i tha të premten presidentit ukrainas, Volodymyr Zelensky që të mos “fyente” polakët, duke mbajtur retorikë të ashpër ndaj Kievit, pasi presidenti polak kishte kërkuar të qetësonte tensionet për importet e grurit.
Polonia vendosi javën e kaluar të zgjasë një ndalim për importet e grurit ukrainas, duke tronditur marrëdhëniet e Kievit me një fqinj që është parë si një nga aleatët e saj më të vendosur që kur Rusia pushtoi Ukrainën në shkurt të vitit të kaluar, raporton Reuters.
Zelensky zemëroi fqinjët e tij kur i tha Asamblesë së Përgjithshme të Kombeve të Bashkuara në Nju Jork se Kievi po punonte për të ruajtur rrugët tokësore për eksportet e drithit, por se “teatri politik” rreth importit të drithërave po ndihmonte vetëm Moskën.
"Dua t’i them presidentit Zelensky që të mos ofendojë më kurrë polakët, siç bëri kohët e fundit gjatë fjalimit të tij në OKB,” citohet të ketë thënë kryeministri Mateusz Morawiecki nga agjencia shtetërore e lajmeve PAP.
Kanadaja do të dhurojë rreth 430 milionë euro, në ndihmë ushtarake për Ukrainën gjatë tre viteve të ardhshme.
Këtë e bëri të ditur kryeministri kanadez, Justin Trudeau, para Parlamentit kanadez ku priti për një vizitë presidentin ukrainas Volodymyr Zelensky, raporton The Guardian.
Kanadaja gjithashtu do të dërgojë avionë luftarak F-16 dhe do të bëjë një angazhim afatgjatë dhe shumëvjeçar që do të sigurojë mbështetje të vazhdueshme ushtarake për Ukrainën, duke përfshirë para për 50 automjete të blinduara.
Sekretari i Përgjithshëm i OKB-së Antonio Guterres dhe ministri i Jashtëm rus Sergei Lavrov, janë takuar në New Yok.
Ata diskutuan një sërë aspektesh që lidhen me konfliktin në Ukrainë, raporton shërbimi për shtyp i organizatës.
“Sot Sekretari i Përgjithshëm u takua me Ministrin e Punëve të Jashtme të Federatës Ruse Sergei Lavrov. Sekretari i përgjithshëm dhe ministri i jashtëm diskutuan aspekte të ndryshme që lidhen me konfliktin në Ukrainë”, thuhet në deklaratë.
Kanadaja ka paralajmëruar komunitetin kibernetik që të shtojë vigjilencën gjatë vizitës së presidentit ukrainas, Volodymyr Zelensky, në vend.
Komuniteti kanadez i sigurisë kibernetike, veçanërisht operatorët e faqeve të internetit të qeverisë dhe infrastrukturës kritike, duhet të miratojnë rritjen e vigjilencës dhe të forcojnë ndërgjegjësimin dhe mbrojtjen e tyre ndaj kërcënimeve kibernetike me qëllim të keq, paralajmëroi të premten një deklaratë nga Institucioni i Sigurisë së Komunikimit të Kanadasë (CSE), raporton ctvnews.
“Ne kemi vërejtur se nuk është e pazakontë të shohim rritje të fushatave të shpërndara të mohimit të shërbimit (DDoS) kundër vendeve të NATO-s që mbështesin Ukrainën, ose presin vizita nga zyrtarë të qeverisë ukrainase’, thuhej në deklaratë.
Presidenti ukrainas, Volodymyr Zelensky, falenderoi Kanadanë për mbështetjen e saj ndaj Ukrainës gjatë një takimi me kryeministrin kanadez Justin Trudeau të premten në Otava.
“Dua të falenderoj që në këtë periudhë të vështirë ju pritët ukrainasit dhe na ndihmuat në fushën e betejës, ushtarake, financiare dhe humanitare, gjë që është vendimtare”, tha Zelensky.
Presidenti ukrainas la të kuptohet se ai mund të vizitojë Kanadanë me fëmijët e tij “pas fitores” në luftën e Ukrainës me Rusinë.
“Faleminderit që qëndruat me ne”, tha Zelensky, duke shtuar se Kanadaja mbështeti Ukrainën që para pushtimit.
Trudeau tha se ky takim shërben si një mundësi që ai "të ulet dhe të bisedojë për të gjitha gjërat që duhet të bëjmë së bashku" dhe të qëndrojë fuqishëm kundër Rusisë. Kryeministri tha se Kanadaja qëndron “fuqishëm dhe pa mëdyshje” me Ukrainën.
Ministri i mbrojtjes i Ukrainës, Rustem Umerov, është gjithashtu në Otava duke zhvilluar bisedime dypalëshe me homologun e tij kanadez në një përpjekje për të mbështetur mbështetjen ushtarake.
Kryeministri kanadez Justin Trudeau ka zhvilluar një takim dypalësh me presidentin ukrainas Volodymyr Zelensky në Otava, në të cilin ka “përsëritur mbështetjen e vazhdueshme ushtarake, ekonomike, humanitare dhe zhvillimore të Kanadasë për Ukrainën, ndërsa ajo vazhdon të mbrohet kundër luftës brutale të agresionit të Rusisë”.
Në një deklaratë të lëshuar nga zyra e shtypit Trudeau të enjten u konfirmua “do të vazhdojë të qëndrojë me Ukrainën për aq kohë sa duhet”.
“Të dy liderët do të vazhdojnë të punojnë ngushtë së bashku për të forcuar lidhjet midis vendeve tona dhe për të ndihmuar që populli ukrainas të vazhdojë të mbrojë veten kundër pushtimit brutal dhe të pajustifikueshëm të Rusisë”, thuhet në deklaratë.
Të dy liderët do të marrin pjesë në një ceremoni nënshkrimi “për të vazhduar forcimin e lidhjeve ekonomike midis dy vendeve tona”. Trudeau më vonë postoi një video në X duke mirëpritur Zelenskyn dhe Zonjën e Parë Olena Zelenska teksa zbarkonin në Kanada, raporton CNN.
Udhëheqësi ukrainas do të mbajë një fjalim në parlamentin kanadez të premten dhe do të takohet me ministrin kanadez të financave dhe udhëheqësit e biznesit në Toronto.
“Kanadaja do të ushtrojë më shumë presion ekonomik ndaj regjimit të Putinit derisa të respektojë integritetin territorial dhe sovranitetin e Ukrainës, duke përfshirë sektorët që janë strategjikisht të rëndësishëm për Rusinë, si nafta dhe gazi. Që nga janari 2022, Kanadaja ka dhënë më shumë se 8.9 miliardë dollarë [6.62 miliardë dollarë amerikanë] në mbështetje të shumëanshme për Ukrainën, duke përfshirë 4.95 miliardë dollarë [3.68 miliardë dollarë] mbështetje financiare direkte dhe mbi 1.8 miliardë dollarë [1.34 miliardë dollarë] ndihmë ushtarake duke filluar nga tanket Leopard 2 dhe sistemet e mbrojtjes ajrore dhe artilerie deri te automjetet e blinduara, municionet dhe më shumë”, thuhet në deklaratë.
Kremlini njoftoi se Rusia sheh rritje të tensionit midis Polonisë dhe Ukrainës në të ardhmen, pas një grindjeje për eksportet e grurit dhe pret që të zhvillohen përçarje të mëtejshme midis Kievit dhe aleatëve të tij perëndimorë.
Opinoni vjen pasi, zëdhënësi i Kremlinit Dmitry Peskov po komentonte njoftimin e Polonisë këtë javë, e cila tha se nuk do të dërgonte dërgesa të reja armësh në Ukrainë. Peskov tha se ishte "e pashmangshme" që tensioni midis Kievit dhe kryeqyteteve të tjera evropiane të rritej me kalimin e kohës, raporton agjencia e lajmeve amerikane usnews.
"Ne shohim se ka 'fërkime' midis Varshavës dhe Kievit. Ne parashikojmë që këto fërkime do të rriten", tha Peskov.
Polonia ka qenë një nga mbështetësit më të fortë të Ukrainës në konfliktin me Rusinë, por lidhjet midis dy vendeve janë tensionuar nga vendimi i Polonisë për të zgjatur ndalimin e importeve të drithërave ukrainas në mënyrë që të mbrojë fermerët e saj.
Varshava nuk do të heqë ndalimin e importit të grurit ukrainas në tregun polak derisa të merret një vendim i përbashkët me Kievin.
Kështu deklaroi ministri polak i Bujqësisë, Robert Telus, gjatë një konference për shtyp në Varshavë, siç raporton agjencia e lajmeve ukrainase Ukrinform.
Ministri polak konfirmoi se bisedimet me homologun e tij ukrainas, Mykola Solskyi, do të zhvillohen javën e ardhshme. Telus theksoi se, në një telefonatë me ministrin ukrainas, ai kishte kërkuar që bisedimet të zhvillohen në një atmosferë të mirë, veçanërisht për shkak të tërheqjes së ankesës së Ukrainës kundër Polonisë në Organizatën Botërore të Tregtisë.
"Varshava nuk do të heqë embargon derisa të gjejmë një zgjidhje të sigurt dhe efektive për të garantuar interesat e fermerëve polakë dhe për të parandaluar hyrjen e grurit ukrainas në Poloni", tha Telus.
Më pas ai e cilësoi si pozitiv faktin që Ukraina ka filluar të dialogojë me Poloninë drejtpërdrejt dhe jo përmes Komisionit Evropian dhe siguroi se Varshava dëshiron të ndihmojë tranzitin e grurit ukrainas në territorin e saj.
Oleg Kryuchkov, këshilltar për politikat e TI-së i kreut të Republikës së aneksuar nga Rusia, deklaroi sot se pas sulmit me raketa kundër selisë së Flotës së Detit të Zi në Sevastopol, ka ndodhur edhe një sulm kibernetik “i paprecedentë" në Krime.
"Ka ndërprerje të internetit në gadishull, të gjitha shërbimet po punojnë për të eliminuar kërcënimin", tha Kryuchkov, cituar nga agjencia ruse e lajmeve Ria Novosti.
Ukraina dhe Shtetet e Bashkuara janë pajtuar që të nisin prodhimin e përbashkët të armëve, një veprim që do t’i mundësojë Kievit të nisë prodhimin e sistemeve të mbrojtjes ajrore, tha presidenti Volodymyr Zelensky, në përmbyllje të vizitës së tij në SHBA.
Përmes një video-adresimi, Zelensky tha se marrëveshja afatgjatë do të krijojë vende të reja pune dhe një bazë të re industriale në Ukrainë, ekonomia e të cilës është shkatërruar nga pushtimi rus, që nisi vitin e kaluar.
“Ishte shumë e rëndësishme vizita në Uashington që solli rezultate shumë të rëndësishme. Ne do të punojmë së bashku që Ukraina të prodhojë armët e nevojshme së bashku me Shtetet e Bashkuara. Bashkëprodhimi në sektorin e mbrojtjes me SHBA-në është një gjë historike”, tha Zelensky.
Kievi ka intensifikuar përpjekjet për të rritur prodhimin e brendshëm të armëve pasi është rritur shumë kërkesa për armë në Ukrainë, shtet që 19 muaj po përballet me pushtimin e paprovokuar rus.
Presidenti ukrainas tha se Ministria për Industritë Strategjike, që do të mbikëqyrë prodhimin në Ukrainë, ka nënshkruar marrëveshje bashkëpunimi me tri shoqata, ku bëjnë pjesë mbi 2.000 kompani amerikane të mbrojtjes.
Ukraina varet shumë nga mbështetja që Perëndimi duke i dërguar armë. Për të ulur këtë varësi, Zelensky dhe ekipi i tij po kërkojnë të bëjnë reforma në industrinë e mbrojtjes së Ukrainës, për të modernizuar armët e prodhuara në shtet dhe për të rritur furnizimet në vijën e frontit./REL
Përfaqësuesi i Lartë i BE-së për Politikë të Jashtme, Josep Borrell, gjatë një interviste për tabloidin The Guardian tha se hyrja e Ukrainës në BE nuk është e lehtë, për shkak se asaj iu desh të bënte shumë reforma para luftës.
"Të gjithë e dinë se do të jetë e vështirë, sepse Ukraina, para së gjithash, është në luftë dhe po shkatërrohet, fjalë për fjalë. Së dyti, asaj iu desh të bënte shumë reforma tashmë para luftës. Dhe së treti, tani Ukraina, si një anëtare e Bashkimit Evropian, tani do të ishte i vetmi vend që do të përfitonte neto”, tha Borrell.
Borrell tha se Ukrainës dhe BE-së do u duhet të ndërmarrin një proçes të gjatë reformash, ku përfshihet edge përdorimi më i madh i votimit të shumicës së cilësuar në takimet evropiane.
Ai shtoi se Ukraina tashmë ka krijuar një dinamikë të re.
“Prandaj, Ukraina dhe BE-ja, vuri në dukje ai, do të duhet të ndërmarrin një proces të gjatë reformash, duke përfshirë përdorimin më të madh të votimit të shumicës së cilësuar në takimet evropiane. Në çdo rast, pranimi i Ukrainës do të thotë fundi i 'siestës' për zgjerimin e BE-së. Për vite e vite ka pasur një lloj ngërçi dhe asgjë nuk ka ndodhur. Ukraina ka krijuar një dinamikë të re", tha Borrell.
Si përfundim Borrell tha: "Disa vendime janë diskutuar për një kohë të gjatë. A duhet të sigurojmë tanke? Ishte një diskutim i gjatë dhe në fund ne furnizuam tanket. A duhet të sigurojmë raketa kundërajrore Patriot? Pati një diskutim të gjatë dhe më në fund ia dolëm. A duhet t'u ofrojmë aftësi forcave ajrore? Është folur vetëm në fillim të luftës. Tani po trajnojmë pilotët për F-16. Sigurisht, një luftë është një luftë dhe nëse doni t'i siguroni armë dikujt që është në luftë dhe merr sulme të rënda, sa më shpejt, aq më mirë”.
Gjashtëmbëdhjetë persona u plagosën në sulmet me raketa ruse në Kurakhove, Donetsk, në Ukrainën lindore.
Të plagosurit ishin 6 gra dhe 10 burra, të moshës nga 43-82 vjeç.
Kështu ka bërë të ditur prokuroria rajonale, sipas së cilës bombardimet mbrëmë kanë goditur një zonë të banuar të qytetit.
Sulmi u krye me dy raketa të tipit Iskander, e cila shkatërroi plotësisht një ndërtesë dykatëshe dhe dëmtoi ndërtesa të tjera që ndodheshin pranë.
Ekipet e kërkimit janë zhilluar operacionin e tyre kërkimor për të nxjerrë njerëzit nga rrënojat.
Ukraina ka marrë përgjegjësinë për sulmin në selinë e flotës ruse të Detit të Zi në Sevastopol, Krime.
Kështu deklaroi departamenti i komunikimeve përmes një shkrimi në Telegramin e ushtrisë ukrainase.
Thuhet gjithashtu se ky sulm kishte ndodhur më 22 shtator në orën 12:00 me orën lokale.
“Më 22 shtator, rreth orës 12:00 me orën lokale, Forcat e Mbrojtjes të Ukrainës filluan një sulm të suksesshëm ndaj selisë së komandës së Flotës ruse të Detit të Zi në Sevastopolin e pushtuar përkohësisht”, shkroi departamenti i komunikimeve në Telegramin e ushtrisë ukrainase.
