Lushnjë- Një 37 vjeçar i cili shkoi në spitalin e Lushnjës me pretendimin se ishte dëmtuar me mjet prerës ndërkohë që ishte vetëplagosur në makinë me armë zjarri është arrestuar.
Ndërkohë në pranga kanë rënë edhe vëllai dhe shoku i Arens Monkës.
Igli Monka dhe Florjon Veliu fshehën automjetin ku dyshohet se u vetëplagos aksidentalisht 37-vjeçari ndërsa mbështetën edhe deklartën e rreme të tij, tha policia.
Gjatë kontrollit të kryer blutë gjetën dhe sekuestruan 2 fishekë dhe 1 predhë armësh zjarri.
Njoftimi i policisë:
Pas njoftimit të spitalit të Lushnjës, se një shtetas i dëmtuar në këmbë, kishte shkuar për të marrë mjekim, shërbimet e Komisariatit të Policisë Lushnjë nisën hetimet dhe si rezultat i tyre, zbardhën rrethanat e rastit. Në përfundim të veprimeve hetimore u vunë në pranga, shtetasi i dëmtuar, A. M., 37 vjeç, si dhe vëllai i tij, shtetasi I. M., 33 vjeç, dhe shoku i tij, shtetasi F. V., 40 vjeç.
Nga hetimet e deritanishme dyshohet se 37-vjeçari është vetëplagosur aksidentalisht, në automjet, me një armë zjarri, të cilën e posedonte pa leje. Për të penguar zbulimin e së vërtetës, ky shtetas ka deklaruar në spital, se është dëmtuar aksidentalisht me mjet prerës. Aktualisht, ky shtetas është në kujdesin e mjekëve dhe jashtë rrezikut për jetën.
2 shtetasit e tjerë u arrestuan sepse dyshohet se kanë fshehur automjetin ku u vetëplagos shtetasi A. M., si dhe kanë mbështetur deklaratën e rreme të tij.
Gjatë kontrollit në automjetin e gjetur nga Policia, u gjetën dhe sekuestruan 2 fishekë dhe 1 predhë armësh zjarri.
Në drejtimin e Prokurorisë së Fierit, po punohet për të dokumentuar me prova ligjore, të gjitha rrethanat e këtij rasti.
Komente
