Lushnjë- Turisti francez merr makinën me qira dhe e përplas në aksident në Lushnjë, braktis mjetin dhe arratiset pa kryer pagesën.
Policia vendore njoftoi sot (18 gusht) se ka marrë nën akuzë adoleshentin 18-vjeçar H.D., nga Franca, menjëherë pas kallëzimit të pronarit të subjektit të mjeteve me qira. Hetimet ndaj turistit është vendosur të bëhen në gjendje të lirë.
Sipas hetimeve, i dyshuari ka marrë makinë me qira, të cilën e ka aksidentuar me pasojë dëme materiale në një fshat të Lushnjës, ku e ka braktisur duke u larguar, pa kryer as pagesën sipas marrëveshjes.
“Specialistët për Hetimin e Krimeve të Komisariatit të Policisë Lushnjë referuan materialet në Prokurori, ku nisi procedimi penal për shtetasin francez H. D., 18 vjeç, pasi ka kallëzuar shtetasi G. M., 32 vjeç, përfaqësues i një subjekti për dhënien e automjeteve me qira, se 18-vjeçari ka marrë me qira një automjet dhe nuk ka bërë pagesën, por e ka braktisur në një fshat në Lushnjë, pasi është përfshirë në një aksident me pasojë dëme materiale”, tha policia vendore.
Hetimet për rastin i kaluan prokurorisë.
Komente
