Presidenti i Venezuelës, Nicolas Maduro, ka nënshkruar një dekret që i jep atij kompetenca shtesë sigurie në rast se ushtria amerikane sulmon vendin e Amerikës Latine. Masa shënon përshkallëzimin e fundit të tensioneve midis dy vendeve, me Maduron që pretendon publikisht se administrata e Presidentit të SHBA-së Donald Trump po komploton për ta rrëzuar atë.
Mediat e huaja shkruajnë se dekreti do t’i lejonte Maduros të mobilizonte forcat e armatosura në të gjithë vendin dhe t’i jepte ushtrisë autoritetin mbi shërbimet publike dhe industrinë e naftës.
SHBA-të kanë vendosur një flotë anijesh luftarake në Karaibe, të cilën Uashingtoni thotë se ka për qëllim luftimin e trafikut të drogës në rajon.
Në javët e fundit, SHBA-të kanë goditur gjithashtu disa anije që pretendojnë se transportonin drogë të paligjshme nga Venezuela, duke vrarë ata që ishin në bord. Ekspertët kanë vënë në pikëpyetje ligjshmërinë e sulmeve.
Privatisht, Maduro është përpjekur të pajtohet me Trumpin , duke i dërguar një letër homologut të tij në fillim të këtij muaji, duke i ofruar të angazhohet në bisedime të drejtpërdrejta.
Maduro hodhi poshtë pretendimet e SHBA-së se Venezuela luajti një rol të madh në trafikun e drogës dhe i tha Trump se donte që marrëdhënia midis dy vendeve të ishte "historike dhe paqësore".
Megjithatë, zyrtarët ushtarakë amerikanë po hartojnë plane për të goditur objektiva të dyshuara që lidhen me trafikun e drogës brenda Venezuelës, duke cituar burime të njohura me çështjen.
“Ajo që qeveria amerikane, ajo që po bën komandanti i luftës Marco Rubio kundër Venezuelës është një kërcënim”, u tha Rodriguez diplomatëve në një takim të hënën.
Ushtria e Venezuelës ka kryer ushtrime stërvitore me anëtarë vullnetarë të milicisë ditët e fundit, me ushtarë që u mësojnë anëtarëve të publikut të përdorin armët në përgatitje për atë që udhëheqësit e quajnë një ndërhyrje të mundshme amerikane.
Departamenti Amerikan i Shtetit nuk iu përgjigj menjëherë një kërkese për koment.
Kompetencat e dhëna sipas dekretit të nënshkruar nga Maduro do të jenë të vlefshme për një periudhë 90-ditore, me mundësinë e rinovimit për 90 ditë të tjera, sipas kushtetutës së vendit.
Komente
