Një bos i mafies italiane në arrati për 20 vjet u gjurmua në një qytet spanjoll pasi u pa në 'Google Street Vieë'. Gioacchino Gammino, një vrasës i dënuar i listuar në mesin e gangsterëve më të kërkuar të Italisë, u arrestua në Galapagar, një qytet afër Madridit, ku gjatë viteve ai ishte martuar, kishte ndryshuar emrin në Manuel, punonte si kuzhinier dhe kishte një dyqan frutash dhe perimesh.
Policia siciliane kreu disa hetime në kërkimin e saj për Gammino, 61 vjeç, dhe një urdhër arresti evropian u lëshua në vitin 2014. I arratisuri u gjurmua në Spanjë, por ishte Google Street Vieë që ndihmoi për të përcaktuar vendndodhjen e tij të saktë.
Mjeti i navigimit, i aksesueshëm përmes Google Maps, kishte kapur një imazh të dy burrave që bisedonin jashtë një dyqani frutash dhe perimesh.
Gammino u arrestua më 17 dhjetor, por detajet rreth kapjes së tij nuk dolën në dritë derisa u raportuan nga La Repubblica të mërkurën.
Pas 20 vjetësh i fshehur, Gammino mendoi se kishte arritur të shkëpuste të gjitha lidhjet e tij me Siçilinë. Pas arrestimit, ai thuhet se i tha policisë:
“Si më gjetët? Unë nuk kam telefonuar as familjen time për 10 vjet!”
Gammino i përkiste një klani mafioz në Agrigento, Sicili, i cili u kap në një grindje të përgjakshme me Cosa Nostra, rrjeti kryesor mafioz i Siçilisë, në vitet 1990. Ai u arrestua për herë të parë në vitin 1984, kur u hetua nga gjyqtari antimafia Giovanni Falcone.
