Kampionia Olimpike, Majlinda Kelmendi, sot ka pranuar Pasaportën Diplomatike nga Presidenti i Kosovës, Hashim Thaçi. Këtë e ka bërë të ditur trajneri i Përfaqësueses së Kosovës në Xhudo, Driton Kuka.
Presidenti Thaçi i dha solemnisht Kampiones Olimpike Pasaportën Diplomatike. Ambasadorja më e mirë e vendit dhe popullit tim. Presidentit, Kryeministrit Haradinaj dhe stafit në MPJ u jemi mirënjohës për shtyrjen para të kësaj çështje!. Besoj që e ka merituar!
Driton Kuka
Lajmin më pas e ka bërë të ditur edhe Presidenti Hashim Thaçi, ku përmes një mesazhi në rrjetin social Facebook, e ka vlerësuar Majlinda Kelmendin si ambasadoren më të çmuar të Kosovës.
Në mënyrë solemne, sot kam ndarë pasaportën diplomatike për xhudisten e artë, Majlinda Kelmendin, për trajnerin, Driton Kuka, dhe kryetarin e Federatës së Xhudos, Agron Kuka. Majlinda është ambasadorja më e çmuar e vendit tonë dhe personifikon suksesin e Republikës së Kosovës në botë.
Presidenti Hashim Thaçi
