Një aksident i rëndë me një të plagosur ka ndodhur në Lushnje. Në këtë aksident është përfshirë një automjet tip 'Fiat' drejtuesi i të cilit ka humbur kontrollin dhe është përplasur me një mur në buzë të rrugës. Më pas makina ka vijuar duke u rrotulluar dhe ka shkulur një pemë, në fund ka përfunduar me goma në ajër.
I plagosuri është dërguar me urgjencë në spitalin rajonal të Lushnjes ku është nën kujdesin e mjekëve. Dyshohet se shkak i këtij aksidenti të ketë qenë një manovër e gabuar parakalimi e shoferit të 'Fiatit' ku më pas ka dalë në krahun tjetër të rrugës për të shmangur përplasjen.
Ndërkohë policia ka shkuar në vendin e ngjarjes dhe po punon për zbardhjen e rrethanave që çuan në këtë aksident.
Kujtojmë se ky është aksidenti i pestë që ka ndodhur ditën e sotme. Në Vërdovë të Pogradecit është aksidentuar një automjet Land Rover ku për pasojë janë plagosur 8 persona, ndërsa aksidentet e tjera kanë ndodhur në Librazhd, Rrogozhinë e në Balldren.
Komente
