Maliq-Një rast i rëndë abuzimi është shënuar në Maliq. Një 43-vjeçar prej katër vitesh akuzohet se abuzonte me një 12-vjeçare, e cila sot është në moshën 16 vjeçe.
Sipas informacioneve, autori i identifikuar si E. SH është shpallur në kërkim. Ka qenë e mitura që ka denoncuar në prani të prindërve abuzimin që bënte i dyshuari, i cili ishte edhe mik i babait të saj dhe kishin hyrje dalje familjare.
Prej 4 vitesh ai abuzonte dhe i bënte presion të miturës për të mos treguar asgjë. Marrëdhëniet e një pasnjëshme kanë ndodhur në një magazinë në pronësi të autorit, ku dyshohet të ketë dhe kamera sigurie, prej ku do merren filmime nga serveri.
Njoftimi i Policisë për ngjarjen:
"Specialistët për Hetimin e Krimeve të Komisariatit të Policisë Maliq, si rezultat i veprimeve hetimore të kryera nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Korçë, shpallën në kërkim shtetasin:
E. Sh., 43 vjeç, banues në fshatin ...., Korçë, i dyshuar për veprën penale "marrëdhënie seksuale ose homoseksuale me të mitur" (dyshohet se ka kryer marrëdhënie seksuale me një shtetase të mitur 16 vjeçare). Veprimet procedurale me të miturën, janë kryer në prezencën e psikologut, prindit dhe përfaqësuesit ligjor.
Në drejtimin e Prokurorisë vijojnë hetimet për dokumentimin e plotë të këtij rasti dhe për kapjen e autorit të dyshuar. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme".
