Ministrja e Arsimit dhe Sporti, Ogerta Manastirliu vizitoi shkollën e rindërtuar “Gaqi Karakashi” në Kuçovë, një nga 30 objektet arsimore të reja dhe të rehabilituara që do të hapin dyert më 8 shtator, në nisje të vitit të ri shkollor.
“Ministria e Arsimit dhe Sportit është duke punuar intesivisht për të përfunduar bashkë me bashkitë, shkollat e reja, të rehabilituara rishtazi në këtë vit, për të hapur dyert në datën 8 shtator. Ditën e parë të shkollës do të jenë 30 shkolla dhe objekte arsimore të cilat do të hapin dyert për nxënësit në këtë vit shkollor”, tha Ministrja Manastirliu.
Ministrja e Arsimit dhe Sportit Ogerta Manastirliu, me kryetarin e Bashkisë Kuçovë Kreshnik Hajdari dhe drejtuesin politik të PS në Qarkun Berat, Ervin Demo, inspektuan shkollën e re “Gaqi Karakashi” në Kuçovë, e cila do të zhvillojnë procesin mësimor në ambiente bashkëkohore falë investimit prej 1 milion euro nga Ministria e Arsimit dhe Sportit.
“Nxënësit dhe mësuesit e shkollës “Gaqi Karakashi” do të kenë kushte të infrastrukturës së përmirësuar, por edhe komuniteti i zonës do të ketë mundësi që të shfrytëzojë këto ambiente modern, në funksion të zhvillimit të mirëqënies të fëmijëve dhe të rinjve në Kuçovë. Është një shkollë e re e mbështetur me financimin e buxhetit të shtetit në vlerën rreth 1 milion euro. Ajo që është vlerë e shtuar në këtë shkollë janë ambientet sportive, është palestra dhe terreni, i cili do t’i shërbejë edhe komunitetit, duke e kthyer këtë shkollë në një qendër komunitare”, tha Manastirliu.
Krahas përmirësimit të infrastrukturës, Ministrja Manastirliu theksoi se zhvillimi profesional i mësuesve dhe rishikimi i kurrikulave mbeten prioritet edhe për këtë vit shkollor, duke sjellë programe të reja mësimore, aktivitete jashtëshkollore, dhe konkurse kombëtare. Ndërkohë që vijon dhe shpërndarja e librave falas për 236 mijë nxënës të arsimit bazë dhe për kategori të caktuara nxënësish në gjimnaze.
Kryetari i Bashkisë Kuçovë Kreshnik Hajdari dhe drejtuesi politik i PS për qarkun e Beratit Ervin Demo, theksuan rëndësinë e këtij investimi për qytetin e Kuçovës, teksa bënë me dije se me ritme të mira po ecin punimet edhe në investimet të tjera në arsim në këtë qark.
Shkolla 9-vjeçare "Gaqi Karakashi" në Kuçovë është një nga 30 shkollat e reja apo të rikonstruktuara, që do të rihapë dyert për nxënësit dhe mësuesit e saj, në datën 8 shtator. Mbi 8 mijë nxënës në këto shkolla do të fillojnë vitin e ri shkollor në ambiente të reja.
Vetëm në qarkun e Beratit, në këtë cikël buxhetor janë duke u realizuar tre investime të rëndësishme: shkolla “22 Tetori”, Shkolla e Mesme e Bashkuar në Havaleas dhe ajo në Dimal. Vlera e përgjithshme e investimeve në këtë qark arrin në rreth 3 milionë euro, të finacuara nga qeveria shqiptare, në bashkëpunim me pushtetin vendor.
Komente
