Në Maqedoninë e Veriut ka nisur sot vaksinimi i gazetarëve dhe punonjësve të tjerë shëndetësor. Sipas Shoqatës së Gazetarëve për tu vaksinuar ishin paraqitur 631 persona që kanë përmbushur kushtet e përcaktuara nga Ministria e Shëndetësisë, më sëmundje tjera shoqëruese si dhe të moshës mbi 40 vjeç.
Gazetarët, sikur edhe grupet e tjera me rrezik janë vaksinuar me vaksinën ruse SputnikV. Me vaksinën AstraZeneca po vaksinohen personat e moshës mbi 60 vjeç.
Deri të hënën në Maqedoninë e Veriut janë vaksinuar mbi 24 mijë persona. Ministri i Shëndetësisë, Venko Filipçe ka bërë të ditur për uljen e numrit të pacientëve me COVID-19 të shtruar në spitale, sikur edhe për numrin e të infektuarve.
Ai ka thënë se të hënën numri i të infektuarve është rreth 300, por se një statistikë më e saktë nëse ka ose jo ulje të numrit do të dihet të martën, meqë gjatë fundjavës numri i testeve të bëra është më i vogël se ditëve tjera.
Maqedonia e Veriut deri të hënën ka realizuar rreth 700 mijë teste, prej të cilëve 141 mijë janë diagnostikuar me covid-19, prej tyre 4.228 e kanë humbur jetën, mbi 116 mijë janë shëruar ndërsa mbi 20 mijë janë ende aktiv.
