ITALI - Vera e vitit 1984 në Napoli ishte më shumë se e nxehtë, pasi skuadra e qytetit afroi një emër si Diego Armando Maradona (23 vjeç asokohe). Afrimi i tij në Serie A ishte një ngjarje e madhe, teksa mijëra tifozë u mblodhën në stadiumin 'San Paolo', që tani u pagëzua në nder të tij pas vdekjes në nëntor të vitit 2020.
Pas kaq shumë kohe, Pierpaolo Marino, njeriu që afroi Diego Armando Maradonën te Napoli, zbulon se Juventusi, Interi dhe Sampdoria të gjithë ‘e hodhën poshtë’ mundësinë për të nënshkruar fillimisht me ‘El Pibe de Oro’.
“Në atë kohë, unë isha drejtori më i ri në Serie A dhe për të festuar sigurinë e qëndrimit të Avellinos në ligë, përpilova një kontratë me Barcelonën me vlerë 100,000 dollarë për të luajtur një miqësore nëse ata do të sillnin Maradonën me vete”, ka thënë fillimisht Marino për Radio Serie A.
“Vetëm tetë ditë para ndeshjes, ndërmjetësi që punoi për marrëveshjen, agjenti i FIFA-s Riccardo Fuiga, mbërriti në zyrën time për të më paralajmëruar se do të vinte Barcelona, por pa Diegon, sepse ai kishte pasur një grindje me klubin. Ai më tha të gjeja diçka për 40,000 shikuesit që po vinin në stadium.
Pra, Fuiga më propozoi që të përpiqem të bëj dikë në tregun italian për të marrë Maradonën. Të vetmet klube që mund ta përballonin atë ishin Juventus, Inter dhe Sampdoria. I kontaktova të treja, por asnjëra prej tyre nuk pranoi. Të gjithë më refuzuan. Fuiga ishte i habitur, ai tha se si është e mundur që ne po i ofrojmë Maradonën dhe nuk mund të gjejmë një klub?", tha fillimisht Pierpaolo Marino.
Napoli nuk e kishte fituar kurrë titullin e Serie A, por Marino gjeti një klub që e dinte se numri i madh i shitjeve të fanellave dhe frekuentimi i tifozëve mund ta paguante këtë investim.
“Disa netë para lëvizjes isha në darkë me Antonio Julianon, drejtorin e Napolit, i cili më tha se po kërkonin një lojtar të huaj. Të nesërmen në mëngjes, ne organizuam një takim. Pastaj pjesa tjetër është histori”, përfundoi Marino.
Maradona shënoi 115 gola dhe dha 76 asistime në 257 paraqitje me fanellën e Napolit. Ai fitoi dy tituj të Serie A me Napolin, Kupën UEFA, Kupën dhe Superkupën e Italisë.
Pierpaolo Marino, njeriu që afroi Maradonën te Napoli
Komente
