Mat- Një sasi lënde plasëse artizanale dhe e paaktivizuar, është gjetur ditën e sotme në qytetin e Burrelit.
Policia vendore konfirmoi se në lulishten e lagjes "Pjetër Budi", është konstatuar një pako e vogël, dyshohet me lëndë lënde plasëse artizanale e paplasur.
“Nga shërbimet e specializuara xheniere, po bëhet verifikimi për përmbajtjen e pakos dhe më pas heqja e saj”, thuhet në njoftim.
Një perimetër sigurie është krijuar me qëllim marrjen e lëndës plasëse dhe shpërthimit të kontrolluar të saj, për të shmangur ndonjë incident.
Grupi hetimor në drejtimin e Prokurorisë, vijon punën për zbardhjen e plotë të rrethanave të këtij rasti, si dhe për identifikimin dhe kapjen e autorit apo autorëve.
Fillimisht u njoftua në disa media se alarmi për bombë ishte dhënë në Burgun e Burrelit, por vetë institucioni doli publikisht me një reagim, ku sqaroi se nuk ishte e vërtetë.
"Në lidhje me lajmet që po qarkullojnë në media për një alarm për bombë në Burgun e Burrelit, ju informojmë se ky lajm nuk është i vërtetë. Pranë Institucionit të Ekzekutimit të Vendimeve Penale (IEVP) Burrel nuk ka pasur asnjë alarm të tillë", thuhet në njoftimin zyrtar të Burgjeve.
