Gjashtëdhjetë e nëntë emigrantë humbën jetën pasi një varkë plot me emigrantë u përmbys më herët këtë javë pranë bregut të Mauritanisë, njoftuan të premten autoritetet e rojes bregdetare.
Tragjedia ndodhi pasi pasagjerët e anijes panë dritat e një qyteti bregdetar rreth 80 kilometra në veri të kryeqytetit Nouakchott. Kjo gjë shkaktoi një panik mes pasagjerëve, të cilët u grumbulluan në njërën anë të anijes, duke e përmbysur atë.
“Kur migrantët panë dritat e qytetit Mheijrat, ata u përpoqën të lëviznin në njërën anë të anijes, duke shkaktuar përmbysjen,” tha kreu i rojës bregdetare.
Anija besohet të ishte nisur nga Gambia një javë më parë, duke transportuar rreth 160 persona, përfshirë shtetas të Senegalit dhe Gambias. Fillimisht, numri i të vdekurve u raportua si 49, por më vonë autoritetet e rritën këtë shifër në 69. Shtatëmbëdhjetë persona arritën të shpëtonin.
Mijëra migrantë kanë humbur jetën në vitet e fundit gjatë kalimeve të rrezikshme detare midis Afrikës dhe Evropës. Sipas Organizatës Ndërkombëtare të Migracionit (IOM), vetëm në vitin 2024 kanë humbur jetën të paktën 8,938 persona.
Komente
