Në GJKKO është mbajtur seanca e parë për dosjen 5D, ndërsa gjykata nuk ka pranuar gjykimin e shkurtuar për të pandehurit, ish drejtorë dhe ish zyrtarë të bashkisë së Tiranës. SPAK ka kërkuar kohë për të përgatitur listën e dëshmitarëve dhe parashtrimin e provave për çështjen penale.
Gjykata e Posaçme vendosi më 14 Shkurt kalimin për gjykim të kësaj dosjeje. Dy ish drejtorët e bashkisë së Tiranës, Redi Molla dhe Mariglen Qato do të gjykohen për veprat penale të korrupsionit pasiv, mosdeklarim pasurie dhe pastrim parash ndërsa ish zyrtarët e tjerë, Taulant Tushe, Nestor Muhametllari, Albano Janku, Julian Zanaj dhe Enton Punavia për shkelje të barazisë në tendera.
Hetimet për ish zyrtarët u mbyllën në Dhjetor nga SPAK dhe dosja u dërgua për gjykim.
Sipas Prokurorisë, Redi Molla në cilësinë e ish-drejtorit të përgjithshëm të shoqërisë Ujësjellës Kanalizime Tiranë sh.a, dhe Mariglen Qato si ish-drejtor i departamentit mbështetës në këtë shoqëri dhe në cilësinë e ish-kryeinspektorit të IKMT në Bashkinë Tiranë, kanë qenë pronarët “de facto” të shoqërisë 5D Konstruksion sh.p.k, duke përdorur pronarë fiktivë, ndërsa vetëm në këtë dosje të dërguar për gjykim kanë marrë 12 tendera duke përfituar rreth 2 milionë euro në periudhën 2016-2020.
Hetimet kanë zbuluar se në periudhën 2016-2018, kur Qato ka ushtruar funksionin e drejtorit të Departamentit Mbështetës në UKT, shoqëria 5D ka fituar në kundërshtim me rregullat e prokurimit publik 4 tendera, nga Bashkia Tiranë, “Tirana Parking” dhe “Klubi Sportiv Tirana”.
Komente
