Mbretëria e Bashkuar dhe Bashkimi Evropian kanë arritur një marrëveshje të re pas Brexit që synon zgjidhjen e mosmarrëveshjes së tyre të gjatë tregtare.
Marrëveshja, e cila ndryshon Protokollin e diskutueshëm të Irlandës së Veriut, erdhi pas bisedimeve të nivelit të lartë të hënën në Windsor, Angli, midis kryeministrit të Mbretërisë së Bashkuar Rishi Sunak dhe Ursula von der Leyen, presidentes së Komisionit Evropian.
“Tani kemi bërë një përparim vendimtar, së bashku kemi ndryshuar protokollin origjinal dhe sot po shpallim Kornizën e re Windsor”, tha Sunak në një konferencë shtypi së bashku me von der Leyen pas diskutimeve.
“Marrëveshja e sotme ofron tregti të qetë brenda të gjithë Mbretërisë së Bashkuar, mbron vendin e Irlandës së Veriut në bashkimin tonë dhe mbron sovranitetin për popullin e Irlandës së Veriut”, shtoi ai.
Sunak konfirmoi se Parlamenti i Britanisë do të ndërmerrte një votim për marrëveshjen pasi të kishte "kohë që njerëzit ta tretnin", por e përshëndeti përparimin si fillimin e një epoke të re në marrëdhëniet MB-BE.
“Mbretëria e Bashkuar dhe Bashkimi Evropian mund të kenë pasur dallimet në të kaluarën, por ne jemi aleatë, partnerë tregtarë dhe miq… ky është fillimi i një kapitulli të ri në marrëdhëniet tona,” tha ai.
Thelbi i sherrit: Protokolli për Irlandën e Veriut
I ashtuquajturi Brexit ndodhi në 31 janar 2020. Protokolli i Irlandës së Veriut, i cili ende nuk është zbatuar plotësisht, parashikon që provinca britanike të jetë ende pjesë e tregut të brendshëm të BE-së, gjë që krijon një kufi doganor de facto në Detin Irlandez. Qëllimi i protokollit është të mbajë të hapur kufirin midis Irlandës së Veriut dhe Irlandës anëtare të BE dhe të sigurojë paqen në Irlandën e Veriut në përputhje me të ashtuquajturën Marrëveshje të së Premtes së Mirë të vitit 1998.
Unionistët e Irlandës së Veriut e shohin protokollin të papranueshëm, ata kanë frikë për anëtarësimin e rajonit të tyre në Mbretërinë e Bashkuar. Londra kishte rifilluar negociatat me Brukselin për protokollin, kryesisht duke argumentuar se marrëveshja pengonte lëvizjen e mallrave brenda Mbretërisë së Bashkuar.
