TIRANË- Ilir Lloshi u prangos me urdhër të SPAK si pjesë e bandës që trafikoi 6 ton kokainë në Evropë me vlerë 411 milionë euro, por para GJKKO u paraqit pa avokat pasi s’kishte ta paguante. Pas iu gjet një mbrojtës kryesisht gjykata kuptoi se ai ishte arrestuar gabimisht vetëm sepse kishte të njëjtin emër e mbiemër me subjektin e SPAK.
Pas 48 orëve në qeli, GJKKO urdhëroi lirimin e tij. Para trupës gjykuese, Ilir Lloshi tha se nuk ka asnjë lidhje me këto punë dhe madje nuk kishte dalë asnjëherë jashtë shtetit. Ballafaqimi me bashkëpunëtorin e drejtësisë, Erion Alibej dhe krahasimi me foton e ‘mbretit’ të kokainës të shpallur në kërkim, konfirmoi se nuk bëhej fjalë për të njëjtin person që dyshohet si i përfshirë në trafikun ndërkombëtar të drogës. Kështu, gjyqtari Erion Bani vendosi lirimin e tij nga qelia, ndërsa konfirmoi masat e sigurisë arrest me burg për 3 biznesmenët, vëllezërit Artur dhe Klevis Hoxhosmani, bosin e ‘Cinco’-s, Ermir Ndrejaj. Masa e dytë e sigurisë u konfirmua edhe për dy ish-ortakët e tyre, Erion Alibej dhe Plaurent Dervishaj, të cilët ndodhen në qeli edhe për dosjen Plumbi i Artë.
Vëllezërit Hoxhosmani mësohet të jenë shprehur në seancën me dyer të mbyllura se nuk kanë qenë përdorues te SkyECC duke mohuar akuzat, ashtu dhe Ndrejaj, i cili kërkoi dhe masë më të butë sigurie deri në sqarimin e pozitës së tij për shkak se vuan nga një sëmundje e rëndë. Plaurent Dervishaj mësohet të jetë larguar nga salla për të mos pritur vendimin pasi u paralajmërua nga gjykata të mos fliste pa leje.
Grupi është zbuluar jo vetëm nga të dhënat e siguruara nga SkyECC, por edhe deklarimet e bashkëpunëtorit të drejtësisë Erion Alibej. Ndërkohë, Report Tv ka arritur të mësojë përmes burimeve edhe emrin e biznesmenit të shpallur në kërkim, i cili dyshohet se fshihet në Dubai. Bëhet fjalë për biznesmenin Elidon Skëndaj, i njohur dhe me emrat Devid Patrut dhe Devid Boraj. Ai rezulton pronar i një bar kafeje tek zona e Ujit të Ftohtë në qytetin e Vlorës si edhe i një kompanie ndërtimi, Erking shpk.
Nga hetimi rezultoi se ky grup ishte aktiv në vitet 2020-2021 në disa shtete europiane, përqendruar në trafikimin e kokainës dhe hashashit nga Kolumbia dhe Ekuadori drejt BE-së dhe Mbretërisë së Bashkuar. Droga fshihej mes konteinerëve, në paleta druri, kuti me banane ose në thasë me kakao. Vetëm gjatë kësaj periudhe u dokumentuan dhjetëra episode trafikimi e sekuestrimi droge, në total mbi 6 ton dhe kapte vlerën e 411 milionë eurove.
Shumica e drejtuesve jetonin edhe midis vendeve të Bashkimit Evropian dhe Britanisë së Madhe. Anëtarët e grupit komunikonin në “Sky ECC”. Kur dyshonin se droga do kapej, telefonat i shkatërronin. Por SPAK ra në gjurmët e tyre, pikërisht këto biseda të zbërthyera me ndihmën e francezëve.
Ndreaj u arrestua teksa shijonte rrezet e diellit në një skaf luksoz në Palasë, ndërsa policia ushtroi kontrolle në vilën e tij në jug dhe në një apartament luksoz në një zonë rezidenciale në Tiranë. Po në Palasë u arrestuan edhe vëllezërit Artur dhe Klevis Hoxhosmani, ndërsa Ilir Lloshaj u kap në Elbasan.
Nga operacioni u sekuestruan 43,470 euro dhe 5,000 franga zvicerane, si dhe 3 makina, përfshirë një luksoze, Mercedes Benz AMG G63. U bllokua gjithashtu një skaf luksoz, prodhim i vitit 2025. Nga kontrollet u gjetën edhe 2 orë luksi, Rolex dhe Richard Mille, 16 celularë, 19 karta bankare ndërkombëtare dhe të dhëna llogarish të huaja bankare në Dubai, Gjermani, Itali dhe Panama. U sekuestrua gjithashtu një dron profesional, 8 hard disqe dhe pajisje të tjera elektronike të sofistikuara. Në shtëpinë e Artur Hoxhosmanit u gjetën 3 pistoleta pa leje.
Komente
Po ky mir ndrea tu dal foto si seksi boy.. fshatar te mjere! Merru me droge e vidh e grabit e prostitucion Dhe nga ana tjeter nxirr foto si showmen... debil Rri ne burg tashi pjesen me te bukur te jetes.
PërgjigjuKot si lodhen se nuk ja dal as kush
PërgjigjuBobo sa gabime ke bere te kjo fjalia...nje fjale nuk ke kapur tamam pupupu