TIRANE - Është mbyllur me sukses shfaqja e baletit "Liqeni i Mjellmave" në Pallatin e Kongreseve. Dy netët e shfaqjes u pritën me duartrokitje nga publiku. Në mbrëmjen e djeshme shkëlqyen në skenë primabalerina Adela Muçollari me partnerin e saj Fatjon Lito.
Adela Muçollari është shprehur pak ditë më parë në Report Tv se ngjitja e skenë e rolin e mjellmës ishte ëndrra më e bukur e saj. Këtë mbrëmje Muçollari ka kërcyer si një mjellmë e vërtetë.
E gjitha trupa e baletit i ka dhënë premierës gjallëri dhe entuziazëm, por kryefjala e kësaj shfaqje ishin balerinët e rinj. Dy primabalerinat Adela Muçollari dhe Ledja Sula janë të konfirmuara tashmë në skenë, por balerinët Anxhelo Muçollari dhe Fatjon Lito u promovuan si solistë të parë të Teatrit Kombëtar të Operës dhe Baletit duke dhënë më të mirën në rolin e tyre.