TIRANË- Gjykata administrative ka vendosur ditën e sotme shtyrjen e seancës për shqyrtimin e kërkesë padisë të prindërve të kopshtit “Zubeyde Hanim” për shfuqizimin e vendimit për mbylljen tij. Bëhet e ditur se seanca e radhës do zhvillohet më 9 nëntor.
Avokati Franc Terihani, përfaqësuesi i i 50 prindërve të fëmijëve që shkonin në kopshtin turk tha para mediave për mediat se është kërkuar anulim i vendimit për mbylljen e kopshtit si edhe për përjashtimi i gjyqtares. Avokati tha se ka kërkuar përjashtimin e gjyqtares Afërdita Maho me pretendimin se ajo është shprehur njëherë për kërkesën e padisë së “Turgut Ozal”.
“Fëmijët duhen sistemuar sepse ata e kanë zgjedhur vetë institucionin përkatës për tu arsimuar, është e pamundur që të transferohen në një institucion privat sepse kanë dhënë përgjigje negative. Kemi pasur dhe raste kur institucione publike para arsimore kanë refuzuar. Kërkuam anulimin e vendimit për mbylljen e kopshtit. Gjyqtarja është shprehur një herë për çështjen”, tha avokati.
Prindërit e fëmijëve të kopshtit turk ‘Zubeyde Hanim’ kanë kërkuar që Gjykata Administrative e Shkallës së Parë Tiranë të pezullojë dhe shfuqizojë vendimin e qeverisë për mbylljen e këtij institucion. Kjo kërkesë sipas tyre vjen për shkak të dëmit që i është shkaktuar të gjithë fëmijëve, të cilët janë të grup moshave nga 3 deri në 6- vjeç. Prindërit thonë se fëmijët e tyre kanë përjetuar një situatë të rënduar psikologjike.
Në vendimet e qeverisë më 22 shtator, nga Këshilli i Ministrave u vendos mbyllja e kopshtit privat “Zubeyde Hanim”, Tiranë. Kopshti është mbyllur me urdhër të ministres së Arsimit dhe Sportit dhe shkak thuhet se është bërë konstatimi i shkeljeve të rënda të legjislacionit në fuqi.
Kopshtit ju la detyrim të kthejë pagesat e kryera nga prindërit, të bëjnë të mundur transferimin dhe të plotësojë çdo dokumentacion që i kërkohen nga institucionet. Kopshti është hapur në tetor të vitit 1998 dhe është pjesë e shoqërisë “Turgut Ozal” që financohet nga kleriku filantrop, Fethullah Gylen, që njihet si kundërshtari më i madh i presidentit turk Erdogan dhe jeton në SHBA.
