Kreu i PD-së, Sali Berisha ka reaguar lidhur me mbylljen e plaformës Tik Tok të lajmëruar më herët prej kryeministrit Rama dhe ministres Manastirliu. Sipas Berishës, i cili mesazhin e dha pikërisht në këtë platformë që po mbyllet, ky akt u ndërmor jo për shkak të vrasjes së Martin Canit, 14 vjeçar te shkolla Fan Noli një muaj më parë.
Sipas tij, mbyllja e tiktok është një akt censure i Edi Ramës, pasi nuk do që të denigrohet puna e qeverisë së tij në këto platforma të cilat nuk kontrollohen dot.
'Në një akt ekstrem censure, Edi Rama informoi dje se ka vendosur të bllokojë plotësisht platformën e Tik Tok-ut. Sipas tij, ishte ky një shkak madhor i vrasjes së nxënësit në shkollë.
Mirëpo, kompania e Tik Tok informoi se, as i ndjeri Martin, as dhe vrasësi i tij nuk kishin llogari në këtë platformë.
Çfarë del? Kësaj i thonë njëlloj sikur, për të mos patur aksidente, të ndalojmë përdorimin e makinave, apo të ndalojmë përdorimin e rrugëve dhe këto janë absurditete.
E vërteta është se, Edi Rama vendosi ndalimin e platformës së Tik Tok-ut vetëm e vetëm se, aksionet e tij në mediat sociale kanë rënë përtokë, siç dëshmojnë të gjitha sondazhet.
Së dyti, ai nuk i blen dot këto platforma, siç blen media tjera në Shqipëri.
Dhe së fundmi, jemi në prag të zgjedhjeve dhe nuk toleron dot negativitetet e pasqyruara nga qytetarët në këto platforma.
Duke ju garantuar se, platforma e Tik Tok-ut do të hapet menjëherë pas zgjedhjeve, ju ftoj të dashur miq, të postoni në llogaritë tuaja të Tik Tok, por edhe rrjeteve tjera sociale, statuse në mbrojtje të kësaj platforme dhe në dënim të censorit ekstrem, narkodiktatorit Edi Rama', tha Berisha në Tik Tok.
Lajmi kryesor:
Shqipëria mbyll TikTok për 1 vit, reagon kompania kineze: Presim sqarime urgjente! 2 adoleshentët s'kishin llogari tek ne! Rama: E duan 90% e prindërve
G.K//ReportTv.al
