Më 21 shkurt nisin aplikimet për specializimet afatgjatë në fushën e mjekësisë për vitin akademik 2021-2022. Dekani i fakultetit të mjekësisë së përgjithshme Xheladin Draçini thotë se në total janë 319 kuota, ndërsa tregon edhe kriteret që duhet të përmbushin kandidatët.
“Është hapur procesi i specializimeve afatgjata në fushën e mjekësisë, 2021-2022. Në total janë 319 kuota dhe aplikimet nisin nga data 21 Shkurt - 7 Mars.
Xheladin Draçini, dekan i fakultetit të mjekësisë së përgjithshme thotë se nga totali i kuotave të specializantëve 179 janë të lira ndërsa pjesa tjetër do të mbulohen nga Ministria e Shëndetësisë dhe ajo e Drejtësisë. Ai shpjegon edhe kriteret e pranimit.
“Kanë të bëjnë me diplomat përkatëse, përfundimin e studimeve universitare dhe licencën profesionale. Duhet kaluar niveli i anglishtes c1, të cilën kandidatët duhet ta plotësojnë brenda vitit të parë. Pra kandidatët pranohen edhe me nivelin B2. Më i privilegjuari i këtij procesi është kandidati që del i pari. I pari ka të drejtë të zgjedhë nga lista me 316 aplikime”, shprehet Draçini.
Testimi i kandidatëve pritet të zhvillohet në ditët e para të muajit prill.
“Përcaktohet dita e provimit, modalitetit dhe testimi bëhet në Qendrën Shtetërore Arsimore me një përgjigje që është e menjëhershme”, thotë dekani.
Do të jetë Komisioni i vlerësimit i përbërë nga ekspertë të Qendrës së Shërbimeve Arsimore që do të përgatisë listën e kandidatëve fitues duke llogaritur rezultatet e mbledhura te testimit të informatizuar dhe mesataren e duke i renditur ata sipas pikëve në rend zbritës. Tarifa vjetore e shkollimit për studentët që ndjekin programet specializuese në mjekësi është e njëjtë me një vit më parë, 115 000 leke.
