Më 8 tetor kombëtarja U-21 do të nisë grumbullimin për dy ndeshjet e rradhës kualifikuese në Europianin e 2025, në një kohë kur fushata nisi me dy fitore tepër të bukura, që i dhanë kuqezinjve 6 pikë. Tani sfidat e rradhës janë kundër Finlandës më 13 tetor në transfertë dhe kundër Malit të Zi më 18 tetor në shtëpi.
“Mali i Zi është shumë i fortë, po aq sa Finlanda pavarësisht se nuk e kam menduar shumë, pasi ndeshja e parë është kundër Finlandës. Katër pikë janë mirë. Është një objektiv që ne i kemi vendosur vetes dhe mendojmë se mund ti marrim,”-u shpreh Alban Bushi, trajner i Kombëtares U-21.
Ndryshe nga kualifikueset e së shkuarës, Alban Bushi pretendon se këtë herë kombëtarja Shpresa është me një mentalitet ndryshe.
“Grupi e di shumë mirë, që qëllim kanë të shkojnë në Europian, por e dimë edhe që jemi Shqipëria. E dimë çfarë bagazhi kemi, sa të fortë jemi dhe sesi do luftojmë. Edhe këto i dimë ne. Kjo është diçka e mirë; që është injektuar te grupi se duam të shkojmë në Europian. Një fakt që më gëzon shumë,”-tha Alban Bushi, trajner i Kombëtares U-21.
Për dy sfidat e rradhës janë 4 risi në listën me 24 futbollistë të grumbulluar, ndër të cilët Medon Berisha, i cili më herët ka luajtur për Kosovën U-21, ndërsa bën pjesë e ekipit të dytë të Bayern Munchen.
Komente
