Sinjale pozitive për bilancet e bankave po sjell edhe viti 2025. Kreditë me probleme vijojnë të ulen, duke prekur nivelet më të ulëta historike muaj pas muaj.
Shifrat e fundit të Bankës së Shqipërisë tregojnë se kreditë me probleme në muajin janar zbritën në nivelin 4.12%, nga 4.88% që ishin në të njëjtin muaj të vitit 2024, pra janë tkurrur me 0.76%.
E përkthyer në vlerë, kredia e klasifikuar me probleme është në vlerën 346 milionë euro nga 361 milionë euro që ishte vlera në fund të janarit të 2024-ës. Ndërsa totali i kredisë së dhënë për ekonominë në fund të janarit ishte 8.4 miliardë euro, nga 7.4 miliardë euro që ishte në janar të 2024-ës.
Banka Qendrore pati deklaruar se pozitive vjet ishte fakti që nuk u regjistruan kredi të reja me probleme, në raport me vitet e kaluara, madje pati edhe ndërgjegjësim të kredimarrësve problematikë pasi nisë të shlyenin kreditë me probleme.
Por nga ana tjetër ndikim pozitiv në pagimin në kohë të kësteve të kredive ka dhënë edhe ulja e normave të interesit për të gjitha kreditë si në valutë ashtu edhe në monedhën kombëtare. Ulja e interesave i ka bërë më të lira këstet, ndërkohë që edhe zhvlerësimi i valutave po ashtu ndikon pozitivisht në kthimin e kredive që janë marrë në monedhë të huaj.
Vetë bankat për të shmangur rritjen e kredive me probleme po tregohen më të kujdesshme në kredidhënie, duke shtrënguar kushtet sidomos për qytetarët, në mënyrë që të mos rrezikojnë për një tjetër rritje të kredive me probleme.
Komente
