Një nga zonat më të mëdha naftënxjerrë është lagjia "11 Janari" në periferi të Kuçovës ku puset e naftës janë kthyer në rrezik serioz për shëndetin e banorëve. Në gjithe zonën sheh pellgjet e serës. Janë më shumë se 200 familje që kanë ndërtuar shtëpitë e tyre pas viteve '90 në zonën prodhuese të naftës dhe gati çdo familje ka nga një pus në oborrin e saj ose shumë pranë shtëpisë.
Ndotja e shkaktuar nga rrjedhja e puseve është shumë e lartë por duket se banorët janë të pashpresë se situata do të ndryshojë pasi disa herë janë ankuar pranë kompanisë Alpetrol por nuk kanë marrë përgjigje. Ata pohojnë se fëmijë e të rritur janë aksidentuar rëndë ndër vite nga këto puse, ndërkohë që shumë kafshë e shpendë kanë ngordhur sapo kanë rënë në kontakt me naftës e nxehtë që rrjedh prej tyre.
Banorët shprehen se rrjedhja e naftës kudo nëpër lagje ka bërë që tokat e tyre bujqësore të mos prodhojnë dhe pemët frutore të kalben. Vazhdojnë të kërkojnë me ngulm rrethimin e puseve dhe minimizimin e ndotjes së shkaktuar prej tyre.
“Ka një rregull që pusi të jetë 30 metra larg objekteve por nuk është zbatuar. Ka pasur raste që krahu i pusit ka aksidentuar fëmijët. Kjo problematikë vazhdon prej vitesh. Duhen rrethuar patjeter se aty kalojnë fëmijët, por dhe shpendët e kafshët shtëpiake. Këtu është rrezik jete! Jemi ankuar por asnjë masë nuk është marrë”, thanë banorët.
Pyetur nga Report TV, Albeptrol tha se do të investojë për rrethimin e puseve dhe largimin e mbetjeve por nuk dha asnjë sqarim sa i përket afateve kohore apo vlerës së investimit.
“Përsa i përket puseve në pronësi të shoqërisë ‘Albpetrol’, pranë Qendrës së Prodhimit të Naftës në Kuçovë ne kemi parashikuar të kryejmë ndërhyrje në disa prej puseve pranë zonave urbane, të cilat kanë pranë banesa, biznese apo kontakt të drejtpërdrejt me banorët. Ky proçes konsiston në rrethimin e një pjese të puseve në zonën urbane të Kuçovës. Njëkohësisht jemi duke punuar për disa projekte siç është, projekti për rehabilitimin e stacionit të dekantimit, gjithashtu për ndërtimin e një strategjie për menaxhimin e mbetjeve historike”, thuhet në përgjigjen e 'Albpetrol' për Report TV.
Në zonën naftënxjerrëse të Kuçovës ka 1623 puse, nga të cilat 950 janë në gjendje pune.
Komente
Me cfare kuptova une pas 1990, banoret zaptuan tokat midis puseve dhe u zhvendosen aty si pjese e rrumpalles se rregjimit Berisha qe nuk u kujdes per njerezit duke i lene te jetojne ne ish fabrikat, uzinat etj etj duke rrezikuar jeten dhe shendetin e tyre. Zgjidhja me e mire eshte qe banoret te shperngulen nga aty nepermjet programeve qeveritare dhe gjithashtu kompanite e naftes te bejne nderhyrje ne mjedis qe sipas pamjeve duket nje shfrytezim pa kritere dhe ndotje e llahtarshme e mjedisit
Përgjigju