‘Një cep i botës’ pak i njohur për vizitorët e Evropës Lindore i konsideruar si një Tajlandë në miniaturë, me ujëra bruz dhe fluturime të lira, shkruhet në përditshmen britanike “The Sun”.
Shqipëria është kthyer në një destinacion gjithnjë e më popullor për britanikët që kërkojnë pushime të përballueshme dhe mot me diell. Për shumë njerëz, plazhet me rërë të bardhë dhe ujërat e pastra kristal e bëjnë Tajlandën një destinacion të listës së pushimeve, por çmimet janë të larta.
Për pushuesit që duan të shijojnë një copëz të parajsës, por nuk mund të përballojnë shpenzimet e fluturimeve, do të jenë të kënaqur pasi të zbulojnë se ekziston një alternativë shumë më pranë “shtëpisë”.
Shqipëria ndodhet midis Malit të Zi dhe Greqisë dhe destinacioni ka përjetuar një fluks vizitorësh vitet e fundit. Rritja e popullaritetit të vendit është kryesisht falë promovimit të tij në TikTok dhe influencuesve të mediave sociale që kanë pushuar në Rivierën shqiptare.
Ndërsa vendet si Ksamili dhe Saranda në Shqipëri kanë patur një rritje të popullaritet vitet e fundit, disa pjesë të Shqipërisë kanë mbetur nën radarin turistik. Një nga këto vende është Lumi i Shalës, një gji pak i njohur në veri të vendit.
Lumi i Shalës
Videot e Lumit të Shalës shfaqen në mënyrë rutinore në platformat e mediave sociale si, TikTok. Lumi është quajtur “Tajlanda e Shqipërisë” falë ujërave të tij të pastër kristal, vegjetacionit dhe maleve të thepisura, sipas faqes së udhëtimit “North Albania”.
“Lumi i Shalës është një nga vendet më të bukura në Shqipëri dhe ishte lehtësisht një nga pikat kryesore të udhëtimit tim rrugor”, shkruan blogerja e udhëtimeve “The Ginger Wanderlust”.
E vendosur në veri të Shqipërisë, pushuesit mund të arrijnë lumin e ëndërruar përmes një udhëtimi ditor nga Tirana ose Shkodra. Nga kryeqyteti shqiptar, turistët do të duhet të rezervojnë një ekskursion për të vizituar Lumin e Shalës - dhe udhëtimi zgjat katër orë me makinë.
Nga Shkodra, pushuesit do të duhet të marrin një minibus për në Liqenin e Komanit, i cili është rreth 90 minuta. Në terminalin e trageteve të liqenit të Komanit, turistët do të duhet të hipin në një varkë për në Lumin e Shalës, e cila do të zgjasë edhe një orë.
Gjatë muajve të verës, niveli i ujit në Lumin e Shalës mund të ulet, kështu që pushuesve mund t’u kërkohet të ecin në këmbë në disa pjesë të lumit. Pavarësisht se nuk është një destinacion i njohur turistik, ka shumë aktivitete për të bërë në Lumin e Shalës, duke përfshirë zhytje, kajak dhe ecje.
Brigjet e lumit lidhen me ura prej druri të punuar me dorë, që vizitorët të shkojnë në bujtina.
Disa bujtina janë të vendosura përgjatë Lumit të Shalës, duke përfshirë Shtëpinë e Bujqësisë “Bee Eco” dhe “Bujtina Livadhi”.
“Sun Online Travel” ka zbuluar disa akomodime gjatë natës në “Livadhi Guesthouse” me 35 paund për person në pikun e sezonit veror.
Gjithashtu vizitorët ditorë mund të marrin me qira çadra dielli dhe shezlonge nga disa prej bujtinave.
Vende të tjera për t’u vizituar në Shqipëri
Plazhi i Pasqyrave
Ka shumë vende të tjera më pak të njohura për t’u vizituar në Shqipëri, duke përfshirë “Plazhin e Pasqyrave”, i cili u shpall si “Plazhi më i mirë në botë” sipas një studimi te kryer nga ekspertët e agjencisë britanike të udhëtimeve “CV Villas”, në fillim të këtij viti.
Plazhi njihet në mbarë botën si “Plazhi i Pasqyrave” për shkak të efektit reflektues që mund të shihet në ujë kur rrezet e diellit bien në sipërfaqe.
“Plazhi i Pasqyrave” mbetet i qetë edhe në muajt e verës, duke iu dhënë mundësinë të pushoni dhe ndiheni të lirë”, shkruan “Albania Tour Guide”.
“Për më tepër, bregu i detit është mahnitës, nuk do t’u besoni syve, kur të shihni ujin e kaltër të ndezur”.
Gjiri është i rrethuar nga shkëmbinj të bardhë. Sfondi shkëmbor e bën gjirin të ndihet si një vend sekret. Ndërkohë, në fillim të këtij viti operatori turistik TUI e quajti Shqipërinë si një nga destinacionet më të reja të Evropës.
Tirana, kryeqyteti i Shqipërisë, ka kryesuar listën e qyteteve më të lira në vitin 2021.
Xh.K/ReportTv.al![](https://www.report-tv.al/template/img/antipiracynote.jpg)