Kryeministrja italiane Giorgia Meloni ka kërkuar rishikimin e "modelit të saj të Shqipërisë" për dëbimin e shpejtë të refugjatëve pas disa humbjeve në gjykata. Ministri i Brendshëm Matteo Piantedosi konfirmoi në parlament informacionet se emigrantët, kërkesat për azil të cilëve tashmë janë refuzuar në tokën italiane, mund të akomodohen në të ardhmen në kampet shqiptare.
Piantedosi konfirmoi dje për herë të parë në Dhomën e Deputetëve se qeveria po punon për "zgjidhje për tejkalimin e pengesave të dala deri tani” duke mundësuar funksionalitetin e plotë dhe zhvillimin e potencialit të konsiderueshëm për shfrytëzimin e objekteve në Shqipëri që janë pjesë e një objekti me shumë qëllime, tha ministri i Brendshëm italian, Matteo Piantedosi.
Projekti për Shqipërinë, do të vazhdojë me besimin se lufta kundër biznesit kriminal të lidhur me emigracionin e parregullt – i cili përfiton edhe nga përdorimi instrumental i kërkesave për azil – është një prioritet për të qeverisur fenomenin e migrimit në përputhje me detyrimet ndërkombëtare dhe evropiane”, shtoi ai.
Në kampe ekziston mundësia edhe për "arrest para dëbimit".
“Në fakt, veç hotspot-it dhe qendrës së ndalimit për procedurat e përshpejtuara kufitare, tashmë në Shqipëri ka një qendër paraburgimi riatdhesimi, përdorimi i së cilës, pikërisht për këtë arsye, nuk do të sjellë kosto shtesë”, shtoi ai.
Megjithatë, në Shqipëri ka rezistencë ndaj ideve të tilla.
Aktualisht edhe kampi i Shëngjinit dhe ai i Gjadërit janë bosh. Që nga hapja e tyre në vjeshtë, janë mbajtur atje vetëm për disa ditë meshkuj të ndaluar në det nga roja bregdetare italiane, kur ata po përpiqeshin të kalonin Mesdheun.
Planet janë ndërprerë tashmë tre herë nga gjykatat
Në fakt, në Shqipëri, e cila nuk është anëtare e BE-së, zyrtarët italianë duhet të vendosin shpejt për kërkesat për azil dhe më pas t'i dëbojnë aplikuesit. Megjithatë, modeli nuk ka funksionuar deri tani.
Ndërkohë në Itali ka një mosmarrëveshje të fortë mes qeverisë dhe drejtësisë. Në thelb, konflikti ka të bëjë me çështjen se kush mund të përcaktojë nëse një shtet tjetër është një vend i sigurt origjine. Për kampet, qeveria italiane lejon vetëm zgjedhjen e burrave të rritur që, sipas saj, vijnë nga vende të sigurta të origjinës. Gratë dhe fëmijët nuk dërgohen atje.
Drejtësia në Romë i ka bllokuar planet e qeverisë tre herë që nga tetori. Si pasojë, 66 personat, që u mbajtën të ndaluar në Shqipëri u desh të transferohen në Itali. Më 25 shkurt, Gjykata e Drejtësisë së Bashkimit Evropian (GJED) do të merret me këtë model për herë të parë. Ende nuk ka një datë për vendimin.
Kostot mbi 650 milionë euro
Kostot e ndërtimit dhe funksionimit të kampeve vlerësohen në më shumë se 650 milionë euro. Në parim në kampe ka vend për më shumë se 1200 emigrantë. Italia është i vetmi vend i Bashkimit Evropian që operon kampe të tilla jashtë BE-së. Megjithatë, qeveritë e tjera evropiane po i vëzhgojnë nga afër planet.
Italia është një nga vendet më të prekura nga lëvizja migratore në të gjithë Mesdheun. Vitin e kaluar, u regjistruan rreth 66.500 të ardhur të rinj, më pak se gjysma e numrit të pritur në 2023. Në udhëtimin e rrezikshëm herë pas here vdesin njerëz.
Komente
mbaini ne itali refugjatet nuk jemi kosh plerash te depozitohen mbetjet e botes
Përgjigjue shite shqiprin o edi rama telumt
Përgjigju