GJERMANI- Kancelarja në detyrë, Angela Merkel vijon ta vër theksin te rëndësia e vaksinimit kundër koronavirusit, duke thënë se situata e COVID në Gjermani është dramatike.
“Vala e katërt është duke goditur shtetin tonë me fuqi të plotë”, ka thënë ajo në Kongresin e kryetarëve të qyteteve gjermane.
Sipas Merkel, shkalla e vdekjeve është frikësuese, teksa thekson se duhet bërë më shumë për sensibilizim e qytetarëve në mënyrë që të marrin dozën e vaksinës.
“Nuk është shumë vonë për të marrë dozën e parë të vaksinës. Secili person që vaksinohet e mbron veten dhe të tjerët dhe nëse mjaftueshëm njerëz vaksinohen, kjo është rruga për t’i ikur pandemisë”, u shpreh Merkel.
Liderët e landeve gjermane pritet të takohen këtë javë për të diskutuar kufizimet e reja që do të vendosen në kuadër të kufizimit të pandemisë. Instituti Robert Koch ka thënë të mërkurën se në 24 orët e fundit janë regjistruar 52,826 raste të reja të infektimit, teksa koronavirusi shtrihet edhe në shtete tjera në Evropë.
SI.E./ReportTv.al