Sali Berisha është shfaqur në vilën e tij të sekuestruar në Lalëz. Të paktën tre fundjavat e fundit ai është parë aty nga dhjetëra qytetarë, madje edhe në shëtitjen e tij buzë detit. Vila është nën sekuestro nga një vendim i Gjykatës Antikorrupsion pas kërkesës së SPAK. Nuk është e qartë nëse SPAK i ka dhënë leje Berishës ta përdorë atë në verë apo jo. Normalisht duhet t’i japë.
Pasuritë nën sekuestro konservative nuk është e thënë që detyrimisht duhet të merren nën kontroll nga administrimi shtetëror. Ato thjesht duhet të dokumentojnë të ardhura nëse janë biznes, apo të ndalojnë transferimin e pronësisë nëse janë banesë ose vilë pushimi, si vila e Berishës, e cila në këtë rast është në emër të vajzës dhe dhëndrit të tij. Pra, nuk është ndonjë mëkat edhe nëse ai shkon dhe e përdor atë.
Problemi është që me pasuritë e vendosura nën sekuestro ka standarde të ndryshme dhe po kthehen në histori korrupsioni shumë herë më të rënda se vetë akuzat për korrupsion për të cilat janë sekuestruar. Fjala vjen, si vila e Sali Berishës që është në emër të vajzës, edhe vila e shoqes së ish-gruas së Arben Ahmetajt janë nën sekuestro. E para, sepse nën akuzë është dhëndri i Sali Berishës, dhe e dyta, sepse ka dyshime që shoqja e ish-gruas së Arben Ahmetajt që jeton në Zvicër është pronare fiktive dhe vila i përket Arben Ahmetajt, i cili ia ka lënë ish-gruas.
Është shumë e dobët lidhja nga provat ligjore, por sekuestrimi është bërë fakt i kryer dhe e ka vendosur gjykata. Tani Sali Berisha rikthehet në vilën e tij për pushime dhe, sipas meje, është normale ta përdorë derisa është thjesht nën sekuestro konservative. Ndërsa vilën e shoqes së ish-gruas së Arben Ahmetajt e kanë marrë nën administrim dhe e japin me qira shtetërore qesharake për vlerën që ka në treg.
Fjala vjen, vila që gjendet në kompleksin “Green Coast” në Palasë është dhënë nga shteti me një qira 14 mijë euro në vit, ndërkohë që ajo rri jepet me qira deri në 2 mijë euro në natë, nëse e kërkon në agjencitë imobiliare apo në faqet e Instagramit që rrijapin dhe këtë vilë me qira. Pra, praktikisht kemi së pari dy standarde të ndryshme për të njëjtin fenomen: pra vila të sekuestruara me urdhër të SPAK, ku njëra nuk jepet me qira, madje rikthehet i zoti dhe e gëzon dhe nuk ka ndonjë gjë të keqe, dhe një vilë tjetër ku nuk lejohet ta gëzojë i zoti i supozuar apo ish-zonja formale, por pa leje të tyre jepet me qira, shkatërrohet nga qiramarrësit dhe pastaj rri jepet nga ata që e kanë marrë me qira me çmim dhjetë herë më të lartë.
Personat e dyshuar për korrupsion janë ende pa akuzë dhe ende nuk u ka filluar procesi gjyqësor. Ata prezumohen të pafajshëm deri në fund dhe, nëse dalin të tillë, natyrisht që do t’u rikthehet edhe vila — tashmë e shkatërruar dhe e vjedhur nga shteti që i ka arrestuar për korrupsion. Ndërsa në rastin e Berishës është ndryshe dhe paksa më korrekt: nuk ia kanë dhënë me qira, nuk ia kanë shkatërruar, nuk e kanë vjedhur dhe, nëse e fiton gjyqin, nuk i është shkaktuar asnjë dëm.
Nuk po them pse e privilegjojnë Berishën në këtë rast, pasi e përsëris që ashtu duhet të sillen me të gjithë. Pyetja është pse i masakrojnë të tjerët!/ Tema
Komente
