Recital i Leo Messit në La Liga. Argjentinasi jo vetëm që është i papërmbajtshëm por edhe spektakolar. Messi shënoi tregolësh duke udhëhequr Barcelonën në fitoren 4-1 ndaj Real Betis në stadiumin “Benito Villamarin”. Kapiteni tundi rrjetën në minutat 18,45 dhe 85 ndërsa golin tjetër e shënoi po me mjeshtëri Luis Suarez. Barcelona me 66 pikë shkëputet me 10 pikë nga vendi i dytë.
Golat e argjentinasit ishin fantastik dhe Messi rrëmbeu duartrokitjet e tifozëve vendas për të cilët tha:” U jam mirënjohës tifozëve të Real Betis pasi diçka e tillë nuk më kishte ndodhur më parë. Këtu më trajtojnë shumë mirë pavarësisht se jemi kundërshtarë”.
Me 10 pikë larg vendit të dytë që mbahet nga Atletico Madrid katalanasit e kanë në dorë titullin kampion në La Liga. Edhe Messi ndan këtë qëndrim :” Nuk ka asgjë të përcaktuar por varet nga ne ,ka ende pikë në lojë dhe duhet të tregohemi të kujdeshëm” përfundon kapiteni i blaugranëve. /Nga Andi Kapxhiu/
Komente
