Ish-ylli gjerman Mesut Ozil luajti një seri derbesh të mëdha kundër Barcelonës si pjesëtar i Real Madridit, por ai vetë u gjend në mes 'të zjarrit' gjatë periudhës historike kur El Clasico u konsiderua si kulmi i ndeshjeve dhe kjo falë formës së mirë dhe rivalitetit mes Messit dhe Ronaldos.
Përpara El Clasicos të së dielës (nesër), e cili do të luhet në orën 21:00 në stadiumin 'Santiago Bernabeu', Ozil shprehu mendimin e tij në një intervistë për 'Marca', se derbi ikonik spanjoll po kalon një periudhë tjetër, shumë më pak të lavdishme të historisë së tij.
"Në kohën time, El Clasico ishte ndeshja më e madhe në botë. Në ditët e sotme, njerëzit i kushtojnë më shumë vëmendje ndeshjes midis Liverpool dhe Manchester City në Premier League. Por nuk është faji i Real Madridit sepse Reali është ende një nga skuadrat më të mira në botë. Barcelona ka rënë, Barcelona duhet të shikohet në pasqyrë, jo vetëm të ankohet për gjyqtarët", tha Ozil.
