Avokati Spartak Ngjela i ftuar në Report Tv ka komentuar arrestimin e Metës, si edhe ‘analizoi’ punën e SPAK dhe GJKKO. I ftuar në emisionin ‘Studio Live’ me gazetarin Arbër Hitaj, vlerësoi punën e organeve të reja të drejtësisë duke thënë se deri më tani nuk duhet të kemi rezerva.
Avokati Ngjela duke u ndalur tek arrestimi i Metës, apo edhe masa arrest shtëpie për Berishën, thotë se janë persona me mbështetje shoqërore dhe duhet vlerësuar puna e SPAK, pasi ka goditur në nivele të larta.
“Nuk duhet të kemi rezerva deri tani, por profesionalisht nuk ka qenë aq e lehtë sa mendohet. Nuk janë arrestime që bëhen me fushata. Personat që janë nën akuzë kanë mbështetje shoqërore dhe këtë e di SPAK, aq më tepër që kanë ekspertë të huaj. Të shohim nëse do ecin deri në fund ose jo. Unë jam i bindur që po. Deri tani është mirë dhe ka nisur nga nivelet e larta.
Personat që janë arrestuar kanë pasur përkrahje të madhe nga disa lloje forcash në Shqipëri, edhe të fuqishme, edhe ushtarake, edhe popullore. Por kjo tregon një gjë të madhe për ne shqiptarët, opinioni publik shqiptar për korrupsionin s’të përkrah”, tha Ngjela në Report TV.
Ngjela thotë se shqiptarët nuk e pranojnë korrupsionin, ndërsa thekson se nuk pati asnjë revoltë për arrestimin e dy liderëve të opozitës.
“Nuk ishte konceptuar dot nga ekspertët shqiptarë. Gjithë ajo forcë që kishin këta nuk do shpërthente në një formë ose tjetër. Opinioni publik shqiptar nuk e pranon korrupsionin.
Nuk pati revolta politike për arrestimin e liderëve të opozitës. Shumica janë majat, vetëm 2 ose 3 janë këta liderët e djathtë. Ne nuk duhet të gëzohemi, çdo njeri gabon. Këtu nuk flitet për një hakmarrje, por ne na duhet të ndërtojmë shtetin e së drejtës, po shohim që po e formojmë pushtetin gjyqësor”, tha Ngjela.
Një koment e ka edhe për aksionin e opozitës.
“PD kaloi nga sloganet që kishin mërzitur opinionin publik në ide të reja. Këtë duhet të bëjë edhe sot. Protesta s’të jep të drejtë pushteti, të sjell vota. Vota do ide. PD nuk e ka bërë reformën në lidership që të sjellë një elitë të madhe. Jo të eliminojë të vjetrit, por duhet të sjellë një elitë të re”, tha Ngjela në Report Tv.
