TIRANË- Presidenti Ilir Meta ka përshëndetur mesazhet e djeshme nga ndërkombëtarët lidhur me 'Zgjedhoren', duke thënë se arritja e një konsensusi për këtë Reformë është kusht për integrimin e Bashkimin Europian.
Në një mesazh të shkurtër, kreu i shtetit shkruan se Shqipëria duhet t'i japë sinjale pozitive Bashkimit Europian, dhe konsensusi është një prej tyre.
"Mesazhi i djeshëm i Bashkimit Europian është i qartë, zbatimi i kushteve fillon me konsensusin për reformën zgjedhore. 8 qershori po afron! Komisioni Europian mezi po pret të shënojë një lajm pozitiv për Shqipërinë", shkruan Meta.
Postimi i plotë i presidentit Ilir Meta
Ditën e djeshme palët nuk arritën një marrëveshje për 'Zgjedhoren', e megjithatë sipas ambasadoren Yuri Kim ka pasur përparime në disa pika kryesore. Ambasadorët dolën me një thirrje të qartë se 'Reforma duhet të mbyllet patjetër në takimin e nesërm', ndërsa Yuri Kim dha një mesazh të qartë edhe për PD, se nëse nuk ka dakordësi mes palëve përtej rekomandimeve të OSBE/ODIHR-it 'atëherë duhet të heqin dorë nga këto kërkesa'.
