Dështon për të dytën herë seanca paraprake e dosjes “Metamorfoza”, shkak për shtyrjen e gjyqit këtë të premte u bë mungesa e avokatit Elidon Hyseni që përfaqëson dy të pandehur.
Dosja “Metamorfoza” është në fazën paraprake, ku gjykata do vendosë nëse do kalojë apo jo për gjykim. Ndërkohë që shumica e të akuzuarve do të kërkojnë gjykim të shkurtuar.
Më 4 maj, Prokuroria e Posaçme mbylli hetimet dhe dërgoi në GJKKO dosjen për gjykim, për disa të pandehur, ndërkohë që ndau çështjen për disa të tjerë.
SPAK deri tani i ka komunikuar akuzat biznesmenit Pëllumb Gjoka, ish shefit të operacionales Oltion Bistri, i akuzuar për korrupsion, ndërkohë që pjesë e kësaj dosje është edhe ish zyrtari i policisë Ardit Hasanbegaj, i cili nga hetimet e deritanishme dyshohet se ndihmoi anëtarët e fisit Bajri, në planin për vrasjen e Ibrahim Licit e Dorjan Dulit.
Për personat që janë ende në kërkim, në mesin e të cilëve edhe Ervis Martinaj, që rezulton i zhdukur prej muajit gusht të vitit 2022, Struktura e Posaçme ka veçuar hetimin.
