Gjermania, Polonia, Britania, Franca dhe Italia do të zbatojnë sa më shpejt që të jetë e mundur objektivat e reja të NATO-s lidhur me armët dhe numrin e trupave, për të cilat Aleanca pritet të bjerë dakord, u zotua të hënën (13 janar) ministri gjerman i Mbrojtjes Boris Pistorius.
Kreu i Komitetit Ushtarak të NATO-s, admirali Rob Bauer, tha për agjencinë e lajmeve Reuters, se NATO synon të marrë një vendim mbi objektivat e reja për armët dhe numrin e trupave këtë verë.
Aleanca ushtarake dhe politike perëndimore ka qenë nën trysni jo vetëm pas sulmit rus në shkallë të gjerë ndaj Ukrainës në vitin 2022, por edhe së brendshmi, mes thirrjeve të Presidentit të zgjedhur të Shteteve të Bashkuara, Donald Trump, për të rritur nivelin e shpenzimeve ushtarake nga vendet anëtare.
Ministrat e mbrojtjes të NATO-s do të përpiqen të arrijnë një marrëveshje për objektivat e aftësive të reja disa javë përpara se udhëheqësit e tyre të takohen në Hagë më 24-26 qershor, tha admirali holandez Rob Bauer.
Në takimin e nivelit të lartë në Hagë do të diskutohet gjithashtu për rritjen e objektivit ekzistues të shpenzimeve ushtarake të NATO-s prej 2% të prodhimit të brendshëm bruto, në 3%, i paraqitur nga disa ekspertë si një objektiv i ri i mundshëm. Trump, i cili kthehet në Shtëpinë e Bardhë më 20 janar, kohët e fundit kërkoi një objektiv të ri shpenzimesh të mbrojtjes në nivel prej 5%.
Duke folur pas një takimi me 4 homologët e tij në qytezën polake Noëa Ëies, zoti Pistorius mirëpriti vendimin e NATO-s për të arritur një marrëveshje për objektivat e reja të aftësive të Aleancës në qershor, dhe jo në tetor, sikurse ishte parashkuar, një lëvizje që siç tha ai ishte nxitur nga Gjermania.
“Në këtë mënyrë fitojmë kohë dhe ne mund të fillojmë shumë më herët zbatimin e objektivit,” tha Pistorius për gazetarët.
Në të njëjtën kohë, ai hodhi poshtë përpjekjet e Trump që vendet anëtare të NATO-s të rrisin shpenzimet e mbrojtjes në 5% të Prodhimit të Brendshëm Bruto, duke argumentuar se kjo do të ishte e barabartë me më shumë se 40% të buxhetit total të Gjermanisë.
“Pyetja thelbësore për mua është: Sa shpejt arrijmë ne … çdo aleat, të përmbushim objektivat e reja të NATO-s? … Sa shpejt jemi plotësisht në gjendje të mbrohemi kur është e nevojshme”, shtoi më tej Pistorius.
Ministri i Mbrojtjes së Francës, Sebastien Lecornu, tha se buxhetet ushtarake do të vazhdojnë të rriten, por nuk dha një shifër për një objektiv të ri të NATO-s.
“Gjendja është më e keqe se sa gjatë Luftës së Ftohtë… Ne mund të mposhtemi pa u pushtuar”, tha ai, duke iu referuar sulmeve kibernetike.
Ministri polak i Mbrojtjes Wladyslaë Kosiniak-Kamysz tha se në takimin e ardhshëm të Grupit të Pesë Vendeve në Paris do të diskutohet mbi financimin e Aleancës dhe zhvillimin e industrisë së armëve në Europë.
"Ne do të koordinojmë të gjitha aktivitetet në lidhje me mbrojtjen midis vendeve tona. Ky është një prioritet. Europa duhet të tregojë forcën e saj. Europa mund të jetë përsëri një fener për të gjithë botën, vetëm duhet të thotë qartë: siguria është numri 1", tha ai. /Reuters
Komente
