Teksa pritet që buxheti i shtetit për këtë vit të rishikohet përsëri për të reflektuar të gjitha humbjet nga pandemia COVID-19, Këshilli i Ministrave me propozim të Ministrisë së Financave ka bërë disa rialokime fondesh mes institucioneve. Është shtuar me 16 milionë euro buxheti i Ministrisë së Shëndetësisë, në zërin e përkujdesjes sociale, për ndihmën ekonomike, apo edhe bonusin e lindjeve
“Ministrisë së Shëndetësisë dhe Mbrojtjes Sociale, në buxhetin e vitit 2020, në programin “Përkujdesja sociale”, në artikullin 606, i shtohet fondi prej 2 miliardë lekësh”, thuhet në vendimin e ministrave.
Buxheti i këtij institucioni pas aktit normativ të tretë në muajin korrik arriti në 65.3 miliardë lekë.
Ndërkohë për vitin 2021 buxheti i ministrisë së Shëndetësisë arrin në rreth 70 miliardë lekë, ku në të përfshihet rritja e pagave për bluzat e bardha, rimbursimi i medikamenteve që përdoren për kurimin e COVID-19 në kushte shtëpie, blerjen e vaksinës anti-COVID, si dhe për menaxhimin e emergjencës.
Komente
