Dje është përfolur për një ndeshje miqësore mes Shqipërisë dhe Kosovës. Kuqezinjtë e Panuccit kanë zyrtarizuar njër sfidë të tillë në qershor, në datat e lira të FIFA-s, ndërsa është në pritje për tjetrën, që do ta luajnë në Zvicër, ku do të kryejnë një zbor 8-ditor. Ukraina do të përballet me përfaqësuesen tone më 2 qershor, ndërkohë që për Kosovën duhet pritur, pasi nuk ka asgjë konkrete për momentin.
Ka qenë presidenti i FFK-së, Fadil Vokrri, ai që ka sqaruar gjithçka në këtë drejtim.
“Kemi biseduar një herë, por jo për të gjitha detajet. Është e mundshme të luhet një miqësore kundër Shqipërisë, por nuk është ende asgjë konkrete. Shqipëria ka një ndeshje me Ukrainën dhe ne nuk e dimë se si do të procedojmë, meqenëse presim të luajmë një miqësore, nëse stadiumi i Prishtinës do të përfundojë. Jemi në dilema të mëdha, jo për shkak tonin, por për shkak të stadiumit”.
Fadil Vokrri, President i Federatës së Futbollit të Kosovës