Janë menaxhuar 158 fëmijë në situatë rruge dhe në 4 raste prindërit u dërguan për procedim.
Në ambientet e Kuvendit të Shqipërisë është mbajtur takimi i grupit të deputetëve “Miqtë e Fëmijëve”. Ministrja e Shëndetësisë dhe Mbrojtjes Sociale, Ogerta Manastarliu gjatë fjalës së saj theksoi se janë bërë hapa përpara për garantimin dhe mbrojtjen e të drejtave të fëmijëve.
“Agjenda Kombëtare për të Drejtat e Fëmijëve 2017-2020, është dokumenti i parë politik, i cili është konsultuar me fëmijët. Konsultimi i këtij dokumenti me 106 fëmijë të moshës shkollore, mes të cilëve edhe fëmijë me aftësi ndryshe, tregon se për herë të parë zëri i fëmijëve po dëgjohet”, tha Manastirliu.
Manastirliu paraqiti të dhënat 8-mujore për sa i përket menaxhimit të rasteve për mbrojtjen e të drejtave të fëmijëve.
Për 50 fëmijë janë zbatuar masa mbrojtëse. Në 8-muaj janë identifikuar 165 raste të fëmijëve në situatë rruge, nga të cilat 158 raste prej tyre janë në proces menaxhimi.
Ministrja e vuri theksin tek Linja e Këshillimit të Fëmijëve 116111, e cila për herë të parë po financohet nga Ministria e Shëndetësisë dhe Mbrojtjes Sociale, ku fëmijët mund të denoncojnë vetë çdo situatë dhune.
“Mekanizmi më i ri financiar, ai i Fondit Social i ngritur këtë vit, i jep mundësi bashkive për të parashikuar ngritjen e shërbimeve me bazë komunitare, për të siguruar integrimin social të fëmijëve në nevojë për mbrojtje” , tha ministrja.
Manastirliu u shpreh se kujdesi shëndetësor për nënën dhe fëmijët është po aq i rëndësishëm sa kujdesi social i tyre.
“Kemi përfshirë në kalendarin e imunizimit dhe vaksinimit për herë të parë të vaksinës së rotavirusit, duke e çuar në 12 numrin e vaksinave që ofrohen për fëmijët nga zero në 18 vjeç. Janë 22,369 fëmijë që kanë përfituar bonusin e bebes këtë vit, nga të cilët 15,952 fëmijë të lindur në spitalet publike dhe 6,417 fëmijë të lindur në spitalet private ose jashtë vendit.”, deklaroi Manastirliu.
“Miqtë e Fëmijëve”, funksionon si grup në Kuvendin e Shqipërisë, nën kujdesin e Kryetarit të Kuvendit, z. Gramoz Ruçi.
Grupi “Miqtë e Fëmijëve” përbëhet nga 24 deputetë, të përkushtuar ndër vite në avancimin e të drejtave të njeriut, të fëmijëve, të grave etj, gjë që e bën punën e Grupit, sa të larmishëm aq edhe mbështetës në drejtim të vështrimit të të drejtave të fëmijëve nga këndvështrime dhe eksperienca të ndryshme profesionale, duke propozuar edhe zgjidhje nga ana e ligjvënësve.
Komente
