Orlando (SHBA) - Botërori i Klubeve në SHBA vazhdon të përballet me probleme serioze nga kushtet atmosferike. Kësaj here ishte radha e sfidës mes Benficës dhe Auckland City që të ndërpritej përkohësisht për shkak të motit të keq në Orlando. Sfida në fund u fitua 6-0 nga Benfica, teksa për portugezët debutoi në këtë event edhe mbrojtësi i Kombëtares, Adrian Bajrami.
Ndeshja u ndërpre në pushimin mes pjesëve, teksa Benfica kryesonte me rezultatin 1-0 falë një goli të Angel Di María nga pika e bardhë, i realizuar në minutat shtesë të pjesës së parë.
Një njoftim zyrtar në ekranin e madh të stadiumit konfirmoi ndërprerjen, duke cituar rregullat e sigurisë në Florida, ku çdo aktivitet sportiv pezullohet për të paktën 30 minuta në rast stuhish në zonën përreth.
Ky ishte rasti i tretë brenda vetëm dy ditëve që një ndeshje e Kupës së Botës për Klube pezullohet për shkak të kushteve atmosferike, pas ndërprerjeve të mëparshme të përballjeve Palmeiras - Al Ahly dhe Mamelodi - Ulsan.
PJESA E DYTË - Pas shumë minutave që futbollistët dhe tifozët ishin në brendësi të stadiumit, leja për vijimin e ndeshjes u aprovua dhe secili mori rolet e duhura. Në fraksionin e dytë Pavlidis, Sanchez, Barreiro me dopietë dhe sërish Di Maria e dërguan rezultatin në 6-0.
DEBUTIMI I BAJRAMIT - Për Benfican në minutën e 86-të pati kohë edhe për Adrian Bajramin, mbrojtësin e ri të "Shqiponjave" që u grumbullua nga trajneri Bruno Lage dhe siguroi debutimin në Kupën e Botës për Klube. Vetëm një minutë pasi u fut në fushë, mbrojtësi i Kombëtares u ndëshkua me karton të verdhë.
RENDITJA - Në Grupin C Bayern Munich kryeson me gjashtë pikë duke siguruar një biletë për në 1/8, ndërsa ndeshja e radhës do jetë me Benfican. Një barazim në përballjen e radhës i jep të drejtë portugezëve që të kalojnë më tej.
Komente
