ITALI- 12 persona kanë humbur jetën dhe një tjetër është shpallur i zhdukur si pasojë e motit të keq në Itali.
Dy viktima janë në provincën e Frozinones pasi një pemë i ra mbi automjetin që po udhëtonin, ndërsa një 21-vjeçar ka humbur jetën në provincën e Casertas nga rrëzimi i një peme. Dy të tjerë kanë mbetur të vdekur nga era e fortë janë identifikuar në Terracina në bregdetin e Lazios. Ndërsa një grua e moshuar ka humbur jetën në qytezën Albisola Superiore pasi u godit nga një mjet i fortë.
Mes të lënduarve është edhe një foshnje, e cila ndodhet në spital jashtë rrezikut për jetën. Aksidenti ka ndodhur gjatë mesnatës ku mbi makinën në të cilën po udhëtonte foshnja dhe nëna ra një gur.
Shkollat janë mbyllur në shumë qytete si Roma, Napoli dhe Genova, ndërsa gjithashtu përkohësisht është mbyllur edhe aeroporti i Genovës. Sipas mediave italiane, fluturimet nuk do të rinisin deri në orën 2 të pasdites, kur edhe pritet një përmirësim i motit.
Për të vënë situatën nën kontroll, nga autoritetet italiane janë mobilizuar rreth 5,800 forca zjarrfikëse, të cilat janë angazhuar në zonën e Ligurias, Toscanës, Lazios, Venetos, Friuli-Venezia Giulia, Lombardia dhe Piemontes.
Gazetar Alban Daci në një lidhje direkte në Report Tv, ka folur për situatën e motit në Itali. Daci ka thënë se dëmet materiale janë të shumta, ndërkohë që sipas tij, viktimat e motit të keq, kanë humbur jetën e tyre në rrugë, ku janë përplasur nga pemë dhe makina.
Komente
