Jose Mourinho hedh 'dorezën e sfidës' dhe kërkon nga ekipi i tij, Fenerbahce, që të fitojë trofeun e Europa League. Turqit nuk ia dolën në play-off e Champions League dhe humbja 1-0 në 'Da Luz' kundër Benficas i nxorri jashtë turneut më të rëndësishëm për klube.
Trajneri portugez tha se Benfica e meritoi, sepse ishte më mirë se ekipi i tij.
“Në pjesën e parë Benfica nuk ishte vetëm më e mirë, ishte shumë më e mirë. Në pjesën e dytë ishim ne që luajtëm më mirë, por jo shumë. Krijuam dy raste të rëndësishme në këtë fazë të fundit, pastaj kartoni i kuq e ndërpreu epërsinë tonë. Duke parë ndeshjen në tërësi, fitoi skuadra më e fortë", tha Mourinho.
Tekniku foli edhe mbi zgjedhjen e tij për ta nisur me Talisca dhe jo Duran në sulm.
"Jhon nuk ishte mirë fizikisht, pati probleme dhe u stërvit pak. Talisca është lojtar me një lloj tjetër personaliteti, luan më mirë mes linjave. Ne kërkuam të kishim më shumë zotërim topi në pjesën e parë, por ia dolëm vetëm në të dytën. Nuk më pëlqen të gjej justifikime për gjëra që nuk kanë. Skuadra më e fortë, me lojtarët më të mirë dhe më me përvojë, fitoi dhe e meritoi”, vijoi ai.
Mourinho i ka idetë e qarta dhe kërkon nga të tijtë që të fitojnë trofeun e Europa League.
“Nëse do të shkonim në Champions do të kishim luajtur ndoshta 8 ndeshje, në ‘Europa League’ synimi është trofeu”, tha mes të tjerash trajneri portugez i Fenerbahces.
Komente
