Kongresi i partisë Lega u çel këtë të shtunë në Firence, në ambientet e Fortezza da Basso, me praninë e qindra delegatëve dhe drejtuesve të saj lokalë e qendrorë. Aktiviteti dyditor do të përmbyllet me rizgjedhjen e Matteo Salvinit si sekretar i përgjithshëm i partisë, si dhe me miratimin e ndryshimeve statutore dhe diskutimin e një sërë mocioneve mbi temat kyçe për Legën, si autonomia, drejtësia, emigracioni dhe politika energjetike.
I ftuar special në këtë kongres ishte edhe manjati amerikan Elon Musk, i cili ndërhyri përmes një video-lidhjeje nga Uashingtoni.
Themeluesi i Tesla, SpaceX dhe rrjetit social X, nuk kurseu deklaratat e forta.
Duke kritikuar ashpër kufizimet mbi lirinë e shprehjes, ai deklaroi: “Kush kërkon të kufizojë lirinë e fjalës, është një Mussolini, një Stalin, një Hitler. Kufizimet janë me frymë fashiste”.
Musk foli gjithashtu për emigracionin masiv, të cilin e cilësoi “një çmenduri” që mund të çojë në shkatërrimin e vendeve që e lejojnë: “Një vend nuk është vetëm një gjeografi, por janë njerëzit që e banojnë. Nëse një përqindje e vogël e njerëzve nga pjesa tjetër e botës zhvendoset në një vend si Italia, ai vend nuk do të jetë më ai që ishte”.
Duke komentuar mbi sigurinë në Europë, ai parashikoi rreziqe të mëdha.
“Me terrorizmin, në fund do të shohim masakra në Europë. Miqtë dhe familjet tuaja do të jenë në rrezik. Sulmet po shtohen dhe mediat po përpiqen t’ua minimizojnë ndikimin. Kjo është prirja, dhe duhet marrë seriozisht”.
Në fund, Musk shprehu shpresën për një partneritet më të fortë tregtar mes SHBA-ve dhe Evropës dhe kërkoi ndërprerjen e luftës në Ukrainë, duke thënë se “është çnjerëzore të dërgosh njerëz për të vdekur çdo ditë, pa asnjë plan për paqe”.
Komente
