Javët Kulturore Ndërkombëtare, prej 31 gushtit kanë sjellë në Shqipëri, jehonën e Azerbajxhanit.
Mbrëmjen e së premtes u ngjit në skenën e improvizuar në sheshin “Skënderbej” grupi i njohur ‘Natig’, që performon muzikë tradicionale azerbajxhanase.
Krahas shfaqjes në skenë, publiku pati mundësi të bëhet pjesë e një turi virtual, që njihte me bukurinë natyrore e trashëgiminë e ‘tokës së zjarrit’.
I njohur edhe për krijimin e 12 tipe daullesh, multiinstrumentisti Natig Shirinov që kryeson bendin, rrëmbeu zemrat e publikut shqiptar, duke i bërë pjesë të shfaqjes.
Legjendat, tradita popullore e Azerbajxhanit të sjella në kohë, u përcollën përmes ritmeve të muzikantit, duke i shpalosur publikut shqiptar, një pjesë të shpirtit të vendit të tij.
Performanca e ansamblit të valleve “Perlat e Azerbajxanit”, shoqëruar nga grupi ‘Nating’ shpalosi jo vetëm kërcimin tipik të vendit të tyre, por edhe ngjyrat e kostumeve.
Java Azerbajxhanese sjell mbrëmjen e së shtunës në sheshin “Italia” ritmet e muzikës etno-jazz nga grupi “Buta”.
