Trajneri i Bayern Munich i ka kërkuar drejtuesve që të afrojnë një portier në afatin kalimtar të janarit. Julian Nagelsmann ka treguar se nëse dëmtohet edhe Ulreich, ai nuk do ketë alternativa të tjera veçse të rinjtë e U-19. Kujtojmë se Neuer ka mbyllur sezonin për shkak se theu këmbën duke bërë ski pas Botërorit të Katarit.
"Nuk ka ndryshuar asgjë, kemi nevojë për një portier tjetër, por situata në merkato është komplekse sepse ka edhe klube të tjerë që kërkojnë për këtë pozicion. Nëse dëmtohet edhe Ulreich situata do të komplikohej akoma më shumë, sepse pas tij kemi vetëm djem të rinj në këtë pozicion. Djem që nuk kanë luajtur asnjë minutë në futbollin profesionist dhe ne në pjesën e dytë të sezonit luajmë gjithçka. Për mua është mirë që të merret një vendim, sido që të jetë ai", tha Nagelsmann.
Trajneri i kampionëve në fuqi të Bundesligës foli nga Doha, aty ku Bayern Munich është në fazën përgatitore në përgatitje për rinisjen e sezonit.
