Nasa deklaroi se në ditët në vijim do të nxirrte informacione të reja që kishin gjetur falë robotit Curiosity që ndhodhet prej vitit 2012 në Mars. Agjencia Amerikane e Hapësirës shuajti kureshtjen e të gjithëve nëpërmjet një deklarate që studiuesit e Nasa e cilësojnë zbulimin më emocionues në sipërfaqen e planetit Mars. Curiosity ka zbuluar materie organike në sipërfaqen e Marsit, një zbulim që përforcon akoma më shumë bindjen mes shkencëtarëve se dikur ky planet kishte jetë.
“Mundësitë për të gjetur shenja jete antike në Mars në misionet e së ardhmes sapo na u shtuan”, deklaroi Ashwin Vasavada, shkencëtar në projektin Curiosity. Ekspertët kërkojnë që puna të përqendrohet tek kërkimet e gjetjes së formave të jetës aktuale në Mars.
"Jam i bindur që në misionet e së ardhmes do të zbulojmë të tjera të dhëna më të emocionuese për Planetin e Kuq”-është shprehur Thomas Zurbuchen, shkencëtar i NASA-s.
Materiet organike janë mbetje që krijohen vetëm nga forma jete dhe zbulimi për ekzistencën e tyre në Mars është bërë nga dy grupe të ndryshme shkencëtarësh, që në fund kanë arritur në të njëjtin rezultat. Puna e shkencëtarëve do të bazohet tek përpjekjet për të tërhequr në Tokë mostra të këtyre mbetjeve organike, për t’iu nënshtruar analizave më të detajuara, që do të shpjegonin prejardhjen dhe formën e organizmit që ka lënë pas këto gjurmë.
Sot për sot , sipërfaqja e Marsit është e pabanueshme, por shkencëtarët besojnë fort se miliona vite më parë ai ka qenë i populluar dhe këto pretendime i bazojnë tek gjurmët e lëna nga lumenjtë që dikur besohet se rridhnin në sipërfaqen e tij.