Pas shkeljes së hapësirës ajrore të Estonisë nga Rusia javën e kaluar NATO deklaroi sot se do të përdorë "të gjitha mjetet e nevojshme ushtarake dhe jo-ushtarake për të mbrojtur veten", ndërsa përballet me "një model sjelljeje gjithnjë e më të papërgjegjshme" nga Moska.
Estonia tha të premten se tre avionë luftarakë rusë MiG-31 shkelën hapësirën e saj ajrore për 12 minuta. Incidenti ndodhi një javë pasi rreth 20 dronë rusë hynë në hapësirën ajrore polake, duke bërë që avionët e NATO-s të rrëzonin disa prej tyre.
“Rusia mban përgjegjësi të plotë për këto veprime, të cilat janë përshkallëzuese, rrezikojnë llogaritje të gabuara dhe rrezikojnë jetë. Ato duhet të ndalen”, tha në një deklaratë Këshilli i Atlantikut të Veriut i aleancës.
"Ne do të vazhdojmë të përgjigjemi në mënyrën, kohën dhe fushën që zgjedhim vetë", thuhet më tej.
Takimi i së martës i Këshillit të Atlantikut të Veriut, i përbërë nga ambasadorë nga 32 vendet anëtare të aleancës, u thirr nga Estonia sipas Nenit 4 të traktatit themelues të NATO-s.
Aleatët do të “konsultohen së bashku sa herë që, sipas mendimit të ndonjërit prej tyre, integriteti territorial, pavarësia politike ose siguria” e një anëtari kërcënohet.
Është vetëm hera e nëntë në historinë 76-vjeçare të NATO-s që ky nen është përmendur - dhe dy nga këto raste kanë ndodhur këtë muaj në përgjigje të incidenteve mbi Poloni dhe Estoni.
“Aleatët nuk do të dekurajohen nga këto dhe akte të tjera të papërgjegjshme të Rusisë nga angazhimet e tyre të qëndrueshme për të mbështetur Ukrainën, siguria e së cilës kontribuon në tonën, në ushtrimin e të drejtës së saj të lindur për vetëmbrojtje kundër luftës brutale dhe të paprovokuar të agresionit të Rusisë”, thuhet në deklaratën e NATO-s.
Foto: Mark Rutte
Sekretari i Përgjithshëm i NATO-s, Mark Rutte, tha gjatë një koference për shtyp se do të reagojnë gjithmonë nëse avionët luftarakë rusë shkelin hapësirën ajrore.
"Ne gjithmonë do të reagojmë me qetësi dhe vendosmëri sepse kemi të gjitha sistemet e nevojshme mbrojtëse për të siguruar mbrojtjen e çdo centimetër të territorit aleat. Dhe, sigurisht, ne gjithmonë do të sigurohemi që përgjigja jonë të jetë proporcionale. Të jeni të sigurt se ne do të bëjmë gjithçka që është e nevojshme për të mbrojtur qytetet tona, njerëzit tanë dhe infrastrukturën tonë tha Mark Rutte, teksa theksoi se kjo nuk do të thotë që ne gjithmonë do të rrëzojmë menjëherë një aeroplan.
Më tej Rutte theksoi se vendimet për të rëzuar një avion luftarak rus do të jetë i bazuar në shkallën e kërcënimit.
"Vendimet nëse do të angazhohen avionë ndërhyrës, siç është hapja e zjarrit ndaj tyre, merren padyshim në kohë reale. Ato gjithmonë bazohen në informacionin e disponueshëm në lidhje me kërcënimin që paraqet avioni, duke përfshirë çështjet që duhet të adresojmë, të tilla si qëllimi, armatimi dhe rreziku potencial për forcat aleate, civilët ose infrastrukturën", tha Rutte.
Foto: Flamuri i Norvegjisë
Kryeministri norvegjez Jonas Gahr Store tha se avionët rusë kanë shkelur hapësirën ajrore norvegjeze në tre raste të ndryshme këtë vit, duke theksuar se këto incidente kanë ngritur shqetësime serioze për sigurinë dhe kanë rritur tensionet midis Norvegjisë dhe Rusisë.
"Incidentet në Norvegji janë më të vogla në shkallë sesa shkeljet kundër Estonisë, Polonisë dhe Rumanisë, si në aspektin e vendndodhjes ashtu edhe të kohëzgjatjes. Megjithatë, ato janë incidente që ne i marrim shumë seriozisht", deklaroi kryeministri norvegjez.
Store shtoi se dy incidente ndodhën në det në verilindje të Vardos në prill dhe gusht, ndërsa i treti ndodhi në një zonë të pabanuar përgjatë kufirit tokësor në Finnmarkun lindor në korrik.
Shkeljet kufitare, të cilat përfshinin avionë luftarakë SU-24 dhe SU-33 dhe avionë L410 Turbolet, zgjatën midis një dhe katër minutash, tha kryeministri, duke theksuar se Norvegjia nuk ka qenë në gjendje të përcaktojë nëse ato ishin të qëllimshme apo "për shkak të gabimeve të navigimit".
"Pavarësisht motivit, kjo është e papranueshme dhe ne ua kemi bërë të qartë këtë autoriteteve ruse", tha Store.
Komente
