TIRANË- Avokati Radovan Çela, i cili u vetëdorëzua tre ditë më parë për dosjen 'Toyota Yaris', u la në burg. Gjykata e Posaçme me kërkesë të prokurorit Klodian Braho vendosi vijimin e masës së sigurisë “arrest në burg” që ishte dhënë në mungesë dhe rrëzoi kërkesën e mbrojtjes për një masë më të butë, me argumentin se nuk ka rrezik për tu larguar apo për të prishur provat.
Pas vendimit avokati i Çelës, Isuf Shehu tha se klienti i tij mbajti qëndrim mohues ndaj akuzave dhe se SPAK nuk ka prova për ta fajësuar. Avokati pretendoi se Radoivan Çela nuk ka qenë përdorues i aplikacionit SkyECC.
Radovan Çela akuzohet se ka ofruar ryshfet për të ndikuar në vendimmarrjen e funksionarëve të drejtësisë në 8 çështje penale, 4 nga të cilat të lidhura me dosjen “Toyota Yaris”, që kur kjo dosje ka qenë te ish Prokuroria e Krimeve të Rënda.
Në një rast, Radoivan Çela akuzohet se sëbashku me ish-kryeprokurorin e arrestuar të Vlorës Aurela Zarka ka ndërhyrë në çështjen e Suel Çelës, që ai mbronte, për t’i çliruar pasuritë e sekuestruara në kuadër të Operacionit Forca e Ligjit.
Për dosjen që lidhet me sekuestrimin e 3.4 milionë eurove të fshehura në dy automjete tip “Toyota Yaris” në Portin e Durrësit në 2018-ën, në kërkim vijojnë Astrit Vladi kushëri i të dënuarit më herët për këtë çështje, Elvis Vladi që mbrohej nga Radoivan Çela, dhe ish-oficerja e policisë gjyqësore Erjona Daupaj. Urdhër arrestet nga SPAK u lëshuan pas zbërthimit të bisedave nga aplikacioni SkyECC.
Komente
