3 skuadrat shqiptare që morën pjesë në operacionet e kërkim-shpëtimit pas dy tërmeteve shkatërrimtare në Turqi, përfunduan punën e tyre dhe u nisën për t’u kthyer në atdhe. Pas 11 ditësh pune intensive, rreth 85 trupa, në përbërje të të cilëve ishin efektivë të Forcave të Armatosura, të Emergjencave Civile, ekipeve shëndetësore janë përcjellë me duartrokitje nga përfaqësues të autoriteteve turke, por edhe qytetarë të thjeshtë, të cilët u shprehën mirënjohjen për kontributin e tyre.
Në ceremoninë e përcjelljes ishte e pranishme edhe konsullja shqiptare në Stamboll, Blerta Kadzadej, e cila shprehu falënderimet për punën e palodhur të ekipeve shqiptare.
Koloneli Elton Reso tha se përgjatë këtyre ditëve të kërkim-shpëtimit janë nxjerrë nga ekipet shqiptare 26 persona të bllokuar nën rrënoja, mes të cilëve edhe disa të mbijetuar. Ai kujton si emocionues momentin kur nga rrënojat u nxorr një vajzë e vogël. Ekipet shqiptare në koordinim edhe me emergjencat turke, AFAD u vendosën kryesisht në zonën e Malatyas.
Për rikthimin në atdhe të ekipeve të kërkim shpëtimit, ka reaguar edhe kryeministri, Edi Rama. Nëpërmjet një postimi në facebook, Rama shkruan se ekipet shqiptare të kërkim shpëtimit janë kthyer në Shqipëri duke marrë me vete mirënjohjen e autoriteteve dhe popullit turk.
Një falënderim ka pasur edhe ministri i Mbrojtjes Niko Peleshi, teksa shkruan se Shqipëria do të jetë gjithmonë gati për të dhënë kontrinutin e saj.
"Krenari dhe mirënjohje pafund për 3 ekipet e vajzave dhe djemve nga Forcat e Armatosura, Emergjencat Civile dhe ekipet shëndetësore që kontribuuan përgjatë 11 ditëve në operacionet e kërkim-shpëtimit në zonat e shkatërruara nga dy tërmetet e fuqishme në Turqi. Ata u nisën për t’u kthyer në Atdhe, duke marrë me vete edhe respektin e popullit turk, që njëherësh është vlerësim për Shqipërinë tonë. Të gatshëm dhe solidarë sa herë të jetë nevoja për kontributin tonë", shkruan Peleshi.
Shqipëria iu përgjigj menjëherë thirrjes për ndihmë të Turqisë dhe brenda 24 orëve në zonat e tërmetit mbërriti ekipi i parë i parë shqiptar i shpëtimit. Gjithashtu, në emër të pupollit shqiptar, Kryeministri i vendit Edi Rama u bë pjesë e fushatës ndërgjegjësuese, duke dhuruar 1 milion euro në ndihmë të rindërtimit.
Kujtojmë që Turqia ka qenë një ndër vendet që ka përkrahur më shumë Shqipërinë kur u godit nga tërmeti i 26 nëntorit, 51 viktima. Turqia financoi ndërtimin e një lagjeje në Laç, ku me financimin e qeverisë turke u rindërtuan 522 banesa të reja. 46.3 mln euro përfshirë edhe apartamentet dhe disa xhami dha Turqia në konferencën e donatorëve në Bruksel “Bashkë për Shqipërinë” që Komisioni Evropian organizoi për ringritjen e vendit tonë dhe që mblodhi në total 1.15 miliardë euro grante, hua, e fonde për projekte zhvillimi nga rreth 100 vende.
Skuadrat shqiptare të kërkim shpëtimit, janë kthyer nga Turqia ku për 11 ditë ofruan ndihmën e tyre për të nxjerrë nga rrënojat të mbijetuarit e tërmetit tragjik të 6 shkurtit.
Kryeministri Edi Rama postoi një video në facebook, ku shkruan se 3 skuadrat shqiptare janë kthyer në atdhe duke marrë me vete mirënjohjen e popullit turk për ndihmën e dhuruar.
“Krenari dhe respekt për 3 skuadrat e vajzave e djemve nga Forcat e Armatosura, Emergjencat Civile dhe Shërbimi Shëndetësor, të cilët përgjatë 11 ditëve e netëve u angazhuan në operacionet e kërkim-shpëtimit në zonat e shkatërruara nga tërmeti katastrofik në Turqi.
Ata kthehen në atdhe, duke marrë me vete respektin e mirënjohjen e popullit turk, të mediave e të autoriteteve turke, që njëzëri e kanë vlerësuar Shqipërinë si vendi i vogël me zemër të madhe”- shkruan Rama.
Komente
Mirenjohje per ndihmen qe ofruat
PërgjigjuKane bere pune fantastike
Përgjigjubrovo ju qoft gjithmon e me shume mirenjohje
PërgjigjuKrenar per keto njerez qe sakrifikuan jeten e tyre
PërgjigjuSolidaritetin e tregojme ne cdo moment,rrespekte pafund per FA
PërgjigjuShyqyr jane kthyer shendosh e mire keta heronj qe rrezikuan jeten e tyre.
PërgjigjuShume rrespekte dhe mirenjohje per keta heronj.
Përgjigju