SHBA-Shkarkimi i të paktën tre anëtarëve të stafit të Këshillit të Sigurisë Kombëtare nga presidenti Donald Trump mendohet të ketë ardhur për shkak të ndikimit të Laura Loomer, një aktiviste dhe mbështetëse e teorive të konspiracionit nga e djathta ekstreme. Ajo kishte shoqëruar Trump-in gjatë disa fazave të fushatës së tij zgjedhore.
Edhe pse nuk ka ndonjë rol në administratën e Trump (të paktën për momentin), Loomer ka thënë se këta anëtarë janë "të pabesë" dhe ka njoftuar presidentin për ta.
Loomer vetë ka sqaruar pas një takimi privat me Trump se nuk do të ndante detaje të takimit me të "për respekt ndaj tij" dhe për të mbrojtur "privatësinë institucionale të Zyrës Ovale".
Ajo tha se ishte nder që takoi presidentin dhe i paraqiti përfundimet e saj, duke shtuar se do të vazhdojë të mbështesë programin e tij dhe të theksojë rëndësinë e një kontrolli të fortë për mbrojtjen e presidentit dhe sigurisë kombëtare.
Ajo tha se i kishte dorëzuar presidentit një dosje me prova për akuzat e saj.
Loomer është një influencuese e njohur, e lindur në 1993 dhe me flokë të ngjyrës vjollcë. Ajo krijoi dhe regjistroi termin "Loomered", që përdoret për të përshkruar mënyrën e saj për të befasuar njerëzit me pyetje të papritura dhe shpesh të turpshme.
Në rrjetet sociale, ajo ka promovuar teoritë e konspiracionit për sulmet e 11 shtatorit, duke i quajtur ato një "komplot të brendshëm".
Ajo ka bërë famë edhe me hashtag-un "#proudislamophobe" (përgjithësisht do të thotë se është krenare për islamofobinë) dhe me batutat raciste kundër Kamala Harris, kandidates demokrate për president të origjinës indiane. Për shembull, ajo tha se nëse Harris do të fitonte, Shtëpia e Bardhë "do të kishte erë curry".
Shtypi amerikan kujton se në vitin 2017, ajo ndaloi një shfaqje të "Julius Caesar" në Central Park, në Nju Jork, sepse aktori që luante perandorin ngjante me Trump-in. Ajo shpalli:
"Kjo është dhunë ndaj Donald Trump! Ndaluoni normalizimin e dhunës politike ndaj të djathtës!".
Disa aleatë të Trump e kanë quajtur të tepruar sjelljen e saj.
Ajo ka dështuar të hyjë në Kongres (e ka provuar dy herë), por është parë në Mar-a-Lago, rezidencën private të Trump, të paktën në nëntë raste që nga 2021. Pavarësisht këshillave për ta mbajtur larg, Trump e ka çuar edhe në fushatën e tij zgjedhore, fillimisht në Filadelfia dhe më pas në Nju Jork dhe Shanksville.
Ai thotë se e pëlqen sepse "është një shpirt i lirë", raporton Reuters.
Sipas disa burimeve, Loomer ka marrë pjesë në një fushatë brenda partisë për të diskretituar disa anëtarë të stafit të Shtëpisë së Bardhë, duke publikuar informacione të vjetra për jetën private dhe profesionale të punonjësve për t’i paraqitur ata si "të pabesë" ose të papërshtatshëm për të qenë pjesë e administratës. Njëri nga këta është David Feith, një drejtues i lartë që merret me sigurinë teknologjike.
Dallohet se këta funksionarë janë parë si shumë të prirur për të angazhuar trupat amerikane nëpër botë, duke e kundërshtuar politikën e "Amerikës së Parë" që Trump ka mbrojtur.
Komente
