KROACI - Ish-portieri i Manchester United dhe Ajax, Edwin van der Sar po trajtohet në terapi intensive pasi pësoi një gjakderdhje në tru. Mësohet se 52-vjeçari është duke u trajtuar në një spital në Kroaci, ku ka qenë me pushime.
“Të premten, Edwin var der Sar ka pasur një gjakderdhje në tru. Ai është aktualisht në spital në terapi intensive në gjendje të stabilizuar”, njoftoi klubi i Ajax.
Deri më tani nuk ka informacione të tjera më konkrete. Van der Sar ka fituar Premier League-n angleze 4 herë me Manchester United si dhe një herë Champions League në vitin 2008.
Ai është një legjendë për futbollin holandez dhe për kombëtaren ka luajtur 130 sfida. Edhe pse Ajax nuk dha detaje të tjera, raportohet se Van der Sar u shtrua në spital në Kroaci, pasi aty pësoi hemoragji cerebrale.
Klubi i Ajax i uron shërim të shpejtë ish-portierit. "Të gjithë në klub i urojnë shërim të shpejtë Edwin-it, ne jemi me mendje dhe lutjet tona janë për të".
